Da ka mukotduma rai ka Congress ban mudui pyrshah ia ki 3 ngut ki MLA; rai ban weng naka EC ha KHADC

Syllad | The Rising MeghalayaAugust 23, 2024

Ka liang pyrshah Congress ka la rai ban leit mudui sha ka iingbishar pyrshah ia ka jingleit pyniasoh jong ki lai ngut ki MLA jong ka sha ka party liang synshar National People’s Party (NPP), kata da kaba pyntip ruh ba shen kan sa shim ruh ia ka rai la kan weng noh na ka jingiatreilang bad ka NPP ha Khasi Hills Autonomous District Council (KHADC).

U President ka Congress u Bah Vincent H Pala uaba kren sha ki lad pathai khubor u la ong, “Ngi la iamir jingmut bad ki riew stad ain bad ngi la nangpynkhreh ia ki kot ki sla bad khlem pep ngin mudui da ka mukotduma. Kam don kano kano ka jingartatien halor kane.”

U la pyntip ruh ba ka party ka dang iamir jingmut bad ki riew stad ain halor kumno ban ia aireng pyrshah ia ka hukum jong u Lamphang ka Iingdorbar thaw ain ban aijingithuh ia ka jingleit pyniasoh jong ki laingut napdeng ki sawngut ki MLA, kata u Dr Celestine Lyngdoh (Umsning), Charles Marngar (Mawhati) bad u Bah Gabriel Wahlang na (Nongstoiñ constituency) sha ka NPP ha ka 19 tarik mynta u bnai.

Da kaba pynpaw ba ka thong jong ka BJP ka long ban pynjah kyrteng syndon ia ka Congress hapoh ka ri, u Bah Pala u la ong, “Ka NPP ruh kadon ia kajuh ka sur hangne – kata ka Meghalaya Congress Mukt. Ia kane ka sur la hikai da ka BJP. Ki nongshong shnong ka Meghalaya ki dei ban tip ba ka jingiadei hapdeng ka BJP bad ka NPP ka la nangkhlain.”

Nalor kata une u president ka Congress u pyntip ruh ba kiba bun na ki nongialam jong ka party ki la pynpaw ia ka jingdonkam jong ka party ban weng noh na ka Executive Committee ba la ialam da ka NPP hapoh KHADC bad ka la ieh ha ki nongialam ka party ba shen kin shim ia ka rai halor kane ka phang.

Ka Congress mynta ka don satang arngut ki MDC, kata u Bah Ronnie V Lyngdoh (uba dei ruh u MLA ba la sah marwei na Mylliem) bad u Bah Pynshngainlang N Syiem (Mawkhar-Pynthorumkhrah) ha ka iingdorbar kaba don 30 ngut ki dkhot hadien ka jingleit pyniasoh jong u Bah Charles Marngar bad u Bah Gabriel Wahlang sha ka NPP.

U Bah PN Syiem mynta u bat kum u Deputy Chief Executive Member (Dy.CEM) ha ka EC ba la ialam da u Bah Pyniaid Sing Syiem.

“Ka jingsngew ki nongialam jong ngi ka long ba ngi dei ban leit marwei shapoh District Council bad ki la shaniah ruh ha u president bad ka kynhun jong u ban bishar bniah ia ki jingdonkam baroh. Ka jingsngew jong baroh hi ka long ba kim sngewtynnad ia ka rukom ba ka NPP ka leh bad ia kaba la jia hapoh ka District Council. Kumta, kiba bun na ki, ki pyrkhat bad ngi dei ban mih noh na ka Council,” ong u Bah Pala.

Shuh shuh u Bah Pala u la ong ruh ba ka rai jong ka Congress ban kyrshan ia ka EC ka NPP ha KHADC ka dei kaba la pynshong nongrim halor ki mat kiba iadei bad ka jingpynkylla thymmai ia ka Sixth Schedule ka Riti Synshar khadar jong ka Ri bad ka jingphiah ia ki constituency hashwa ban leit sha ka elekshon MDC.