Da ka phlim Rngai, yn khring paidbah biang u Bah Kenny Lyngdoh 

Syllad | The Rising MeghalayaJanuary 21, 2024

Hadien shi snem ba u lah pynmih ia ka phlim “Khat Saw Phra 14/8” uwei napdeng ki nongshna phlim ba tbit na ka jylla, u Bah Kenny Lyngdoh, u lah pynkhreh ban wanlam biang sha ki paidbah ia ka phlim ka ban pyniapbiej ia ki bad ka ban pynsah ia ki paid nongpeit ha ka jinglyngngoh (suspense thriller).

Kum ban shu pynkynmaw u bah Kenny u lah don bynta ban pynmih ia ka phlim Gangs of North East (2017) bad ban shna ia ka phlim AHOR (2022).

Ha ka phlim ‘Unveiling Shadows (RNGAI)’,  lah ak da kawei napdeng ki puron ba pawnam ka Regina Lamo. Ka phlim ka iathuh khana shaphang ka jingban khia ka jingsngewsih jong ka hadien ka  jingshahpynïap ka kmie bad ba ia dei shipara bad ka. Ha kum kane ka jingshem lanot jong ka, ka don ka jingthmu ban wad ia ka tynrai bad ka daw jong ka jingshahpyniap ki baieid bathoiñ jong ka. Ha ka jingiaid lynti jong ka ban wad ïa ka jingshisha , ka shem ïa kiei kiei kiba pynher syrngiew ïa ka. 

U bah Kenny Lyngdoh u ong, “Kane ka phlim ka pyni ba, ia kiei kiei baroh kam long kumba ngi mut ne iohi nabar. Kane ka phlim ka iathuh khana ia ka jingiaid lynti jong ka aktres bad jingshem jong ka ïa bun ki jingpynthame, ki jingartatien.”

Ka aktres Regina Lamo kan iatreilang bad u nongshna phlim Kenny Lyngdoh.

Ha kane ka phlim ngin iohi ruh ïa kiwei kiwei ki tyngshop ki puron kiba paw kum Jeremy Khongjee, Banatimon Mawlong, Mangkara Khongthohrem, Brandon Sunn, Phidalin Kharsyntiew, MewanpynbhalangTham bad kiwei kiwei ruh.

Ka ‘teaser’ jong kane ka phlim lah dep pyllait ha YouTube channel bad ia ka phlim yn pyllait ha u bnai Rymphang.