Da ka pisa ba synniang ki nongtih dewiong bad mawshun yn siang phlang plastic ha Dienshynrum Khliehriat

Syllad | The Rising MeghalayaSeptember 6, 2022

Ka lah ban long ka khubor kaba sngewtynnad iaki paid riew ieid football ha baroh kawei ka district jong ka East Jaintia Hills, hynrei ka jingkylli kalong hato ka dei pat ka lynti kaba dei ban pyndonkam da ka pisa ba synniang ki nongtih ne nongkhaii marpoh khyndew (Dewiong/Mawshun) ban siang iaka madan phlang plastic ne artificial turf ha Dienshynrum, Khliehriat, East Jaintia Hills.

Kane ka pisa kaba la mang ban tei ia katei ka madan ka long T.20 lak bad la aiti da u MLA ka Khliehriat u Ma Kyrmen Shylla sha u Chairman ka DMF uba long ruh u Deputy Commissioner, East Jaintia Hills District u Abhilash Baranwal haka sngi Nyngkong.

Kane ka pisa ba synniang ki nongtih mar pohkhyndew ne miners ka dei ka District Mineral Fund (DMF), kaba ia kane ka pisa bunsien la synniang sha ki briew kiba shah ktah na ka kam tih mar pohkhyndew, ban pynim iaki briew kiba duk kiba kyrduh haka kam ri jingri bad ka kamrep ka riang, nalor ban leh kino kino ki prokram ban myntoi lang u paidkar salonsar bad kita ki dei ki jingdonkam ba kongsan u briew naduh ka koit ka khiah, ka umbam umdih, school bad kiwei kiwei ki kam tei jingtei.

Ym lah ban len ba ka Football ka dei ka syiem jong ka jingialehkai ha Jylla baroh kawei, hynrei ki don kiwei kiwei pat ki skim kiba lah ban wanrah ban tei ia katei ka madan plastic.

Ka jingkylli uba bun u riew ieid football hapoh ka district ka long hato ka pisa na ka DMF kan dap kan biang ban ioh ia u ta phlang plastic uba paka bad uba biang nadong shadong?

U Ma Kyrmen ula leit ruh ban jurip iaka madan ha ryngkat bad u Deputy Commissioner, ka District.

Ula ong ba u kyrmen ba kane ka madan kan wanrah ka jingmyntoi bad ban pynurlong iaka jingangnud ki samla ban kiew shaphrang haka kam ialehkai bad ban poi sha ka thong.

Nalor u phlang plastic, ka jingshna iaka madan ka kynthup iaka floodlights nalor kiwei kiwei.

U DC ula ong ba kane ka projek ka dei kaba angnud bad kaba kongsan bad donkam iaka jingiatreilang jong baroh haka imlang ka sahlang bad ka jingtrei iaka madan kan sdang naduh ka sngi ba ar. Ula ong ba ia kam tei jingtei yn peit da ka ophis u DC bad yn pynthikna ka jingtrei kan long kaba bha bad yn pyndep kloi.