Da ka put ka tem leh burom iaka jingkhraw bad jingshlur jong ka Phan Nonglait ha shnong Nongrmai

Syllad | The Rising MeghalayaSeptember 1, 2022

Kum shibynta jong ka jingleh burom ia ki riewshlur ialeh laitluid ka ri ha ka jingrakhe jong ka Ri India ia ka Azadi Ka Amrit Mahotsav, ka North East Zone Cultural Centre (NEZCC), Dimapur ha ryngkat ka jingiatreilang bad ka tnat pynneh riti jong ka sorkar jylla Meghalaya haka sngi Balang ka la pynlong iaka prokram ban kynmaw burom “Ka Phan Nonglait”- Tribute to Unsung Heroes kaba long ka prokram lyngba ki sur ieid ri, ki jingshad tynrai bad ka drama ha shnong Nongrmai, Eastern West Khasi Hills District kaba long ka shnong ha kaba la pun la kha bad la pynheh pynsan ia ka riewshlur ialeh laitluid ka ri, Ka Phan Nonglait.

Ka Sorkar India kala ithuh iaka Phan Nonglait kum kawei na ki nongialeh laitluid. Ka Phan Nonglait ka dei ka kynthei kaba nyngkong kaba la ithuh kum nongialeh laitluid kaba rieh kaba shlur kaba iakhun pyrshah iaka sorkar phareng bad u Tirot Sing.

U kongsan u dei u Deputy Commissioner, Eastern West Khasi Hills District, u Bah Wilfred Nongsiej haka jingiadonlang u Syiem ka Hima Nongkhlaw, u Pa’iem P.M Syiemlieh, u Myntri ka Hima Nongkhlaw, u Bah Boldness L Nongum,  Assistant Director ka tnat pynneh riti ka sorkar jylla Kong D Kharjana, kiwei kiwei pat ki ophisar sorkar,  u ‘Riewsaid ain jong ka Iing Bishar Ba Hakhlieh Duh ka Ri India uba long ruh u nongthoh jong ka kot “ Ka Phan Nonglait- A Lady Freedom Fighter of India”, u Bah Daniel Stone Lyngdoh Nonglait, u Sordar ka shnong Nongrmai, u Bah S. Nongrang, ki dkhot jong ka kur Lyngdoh Nonglait, ki khynnah pule bad ki paidbah ka thain.

U Bah Wilfred Nongsiej haba kren halor ka histori jong ka jinglong jingim jong ka Phan Nonglait bad ki kam bakhraw ba ka la leh ha ka jingialeh laitluid pyrshah ia ka sorkar phareng bad ruh halor ka jingshimkhia jong ka halor ka jingshahthombor jong ki kynthei khynnah bad u la kyntu ruh ia baroh kiba la sakhi ia kane ka prokram ba kin ring jingmut na ki kam shlur jong Ka Phan Nonglait da kaba pynneh pynsah iala ka riti dustur bad ban ieng pyrshah ruh ia kino kino ki kam thombor pyrshah ia ki riewkynthei.

Ha kane ka prokram la ioh ban sakhi ia ki jingrwai ieid ri bad ki jingshad tynrai na ki riewdonsap bapher bapher ka Eastern West Khasi Hills District bad na kito kiba la wan na ka nongbah Shillong ruh kumjuh.

La pyniphuh iphieng bad pynshongkhia shuhshuh ia kane ka prokram kynmaw burom ia Ka Phan Nonglait da ka drama halor ka jingim bad jingiakhun jong kane ka riewshlur ialeh laitluid da i Kong Lapdiang Syiem bad ka kynhun jong i.

Kiwei kiwei pat kiba la kren ha kane ka sngi ki kynthup ia ka Assistant Director ka tnat pynneh riti ka jylla, Kong D. Kharjana, u ‘Riewsaid ain ka Iingbishar Ba Hakhlieh Duh ka Ri India uba long ruh u nongthoh jong ka kot ia kaba la ai kyrteng “ Ka Phan Nonglait- A Lady Freedom Fighter of India”, u Bah Daniel Stone Lyngdoh Nonglait, u Sordar ka shnong Nongrmai, u Bah S. Nongrang bad uwei na ki dkhot jong ka kur Lyngdoh Nonglait, u Bah Marshall Lyngdoh Nonglait.