Da ka rally la pynlong ha Khliehriat ban iakhun ia u drok bad HIV/AIDS
Ban pynshai paidbah halor ka jingdonkam ban kiar na kaba dih drok bad ki kam khaii drok, ka Red Ribbon Club (RRC), Jaintia Eastern College, Khliehriat ha ryngkat ka jingiatreilang bad ka Kyrmen Foundation, Lad Rymbai bad Meghalaya AIDS Control Society (MACS), Shillong ha ka 28 tarik u Risaw ki la pynlong da ka jingiaid rally ha Khliehrait, East Jaintia Hills District
La sdang ia kane ka jingiaid paidbah napoh Khliehriat East Parking Lot bad pynkut ha madan Khliehriat Higher Secondary School ha kaba la wan ban iashim bynta shitrhem da ki khynnah skul, nonghikai nalor kiwei pat.
La pynbud hadien da ka jingpynshai halor ka jingpang HIV/AIDS halor ka mat “United for a Healthier Future: Combating Drug Abuse and HIV/AIDS” ha kaba la wan iashim bynta lang da u Myntri Sorkar u Bah Kyrmen Shylla kum u Kongsan ha ka jingiadon lang u Principal, Jaintia Eastern College, u Dr. P. Nongtdu, Programme Manager, Mih-myntdu Community Social Welfare Association (MCSWA), Khliehriat, Kong R Patlong, Cluster Programme Manager, Meghalaya AIDS Control Society (MACS), Khliehriat, Sandy Tariang, ki Rangbah Shnong, ki nonghikai bad khynnah skul.
U Bah Kyrmen Shylla haba ai jingkren u la ai khublei kyrpang ia ki nongpyniaid jong ka prokram da kaba pynpaw ruh halor ka jingdonkam ban pynlong ia kiba kum kine ki prokram kiba thmu ban pynshai paidbah halor ka mat kaba khia shibun kaba iadei bad ka jingkiew rasong ka jingdon jong kiba pyndonkam drok bad ki kam khaii drok ha ka Jylla da kaba khot ruh ia ka jingiatreilang jong baroh ki kynhun ban iakhun pyrshah ia kane ka jingma kaba la pynshong syier shibun ia ka imlang ka sahlang.
Ha kajuh ka por u la khot ruh ia ka jingialang ban pynphriang ia ka khubor ha kaba iadei bad ka jingialap pyrshah ia ka jingdih drok da kaba pyndonkam hok ia ka Social Media na ka bynta ka jingktah kaba kham heh bad pynshlur ia ki nongshong shnong khamtam ia ki samla ban iashim bynta ha ki kam kilan met kynthup ia ki jingialehkai sports na ka bynta ka jingmyntoi jong ka bad ka jingbha jingmiat jong ki bad khnang ban kiar na u drok bad kiwei kiwei ki jingdih kiba pynbuaid.
Da kaba pynksan ïa ka jingdonkam ban pynkhlain ïa ki jingïatreilang, u Bah Shylla u la ban jur halor ka jingdonkam ban sangeh noh ïa ki jingkren bein ne niewbeiñ pyrshah ïa ki briew kiba ïoh ïa ka jingpang HIV/AIDS hapoh ka imlang ka sahlang.
Kham hashwa ha katei ka prokram ka Resource Person kaba dei ka Programme Manager ka Mih-myntdu Community Social Welfare Association (MCSWA), Khliehriat, ka Kong R Patlong haba kren halor ka phang, “Ka jingsniew kaba mih na ka jingpyndonkam ïa ki jingdih pynbuaid” ka la pynpaw ïa ki daw ba ki samla ki ngop ha ka jingdih pynbuaid kiba kynthup ïa ka jingpyrshang, ka jingpynbor jong ki paralok, ki jingeh ha ka longïing, ki jingeh ha ka jingmut jingpyrkhat bad ka jingsuk ban ïoh ïa kum kine ki jingdih buaid.
Kiwei pat kiba la aijingkren ha kane ka sngi ki kynthup ruh ia u Bah Sandy Tariang, Cluster Programme Manager, Meghalaya AIDS Control Society (MACS), Khliehriat, u Principal, Jaintia Eastern College, Dr. P Nongtdu, Assistant Professor, Jaintia Eastern College, Shri B. Dkhar bad kiwei kiwei.
Facebook
Instagram
Youtube
Twitter
Leave a Reply