Da ka rally thuk thuk pynlong ki shipai ka 119 Territorial Army na Shillong sha Cherrapunji

Syllad | The Rising MeghalayaSeptember 16, 2024

Ki shipai ka 119 Territorial Army ha ka 15 tarik Nailur ki la pynlong da ka rally niah thuk thuk ha ka sien kaba 40 na Kenches Trace, Shillong sha Cherrapunji bad wanphai biang sha Shillong shibynta ka jingrakhe ia ka Platinum Jubilee ka jong ki.

Ka jingpynlong ia kane ka rally thuk thuk ka pynpaw ruh ym tang ha kaba iadei bad ka jingdon ia ka jingiatreilang bad ka jinglong ryntih jong ki shipai kane ka tnad, hynrei ruh halor ka jingkut jingmut ha ka jingpyniadei bad ka imlang ka sahlang bad ka jingiashim bynta ha kaba leit shangkai sha kylleng ki jaka.

Ia kane ka rally kaba la sdang naduh ka por mynstep na Kenches Trace la sakhi ia ki nongniah thuk thuk kiba la iaid lyngba ia ki jaka kiba shem shitom bad ki surok ba kyllain ban sakhi ia ki jaka bad ka mariang kaba itynnad kat haduh ban da poi sha Cherrapunji. Kane ka la bteng ruh ha ka jingwanphai da ka jingpdiang sngewbha ha Kenches Trace.

Ka jingpynlong ia kane ka rally ka thmu ban wanrah shuh shuh ia ka jingiajan hapdeng ki nongiashim bynta, ban kyntiew ia ka mynsiem jong ki jingialehkai, ban pynpaw ia ki jinglah bad kotbor jong kane ka tnad shipai. Kane ka long ruh kum ka rynsan ban iakynduh bad ki nongshong shnong bad ban pynskhem ia ka jingiadei hapdeng ki shipai bad ki paidbah.

Na ka liang u heh shipai u Colonel Devashis Nailk uba dei u Commanding Officer 119 Territorial Army u la pynpaw ka jingsngewnguh ia baroh ki nongiashim bynta bad ki nongkyrshan kumjuh. “Kane ka rally ka pynpaw halor ka jingtbit bad ka jingaiti lut jong ki shipai ka Territorial Army.Ngi sngew sarong ia kane ka jingiashim bynta k jong ki bad ka jingiadon bynta lang jong ki nongshong shnong ban pynlong ia kane ka rally kaba jop.”

Ka 119 Territorial Army ka ai ka jingkhublei ia ki bor pyniaid shnong, ki nongkyrshan bad kiwei pat kiba la noh synniang ban pynlong ia kane ka sngi kaba jop.