Da ka shithi phah ki nongiakhun MCS sha ka KSU, kynnoh ba ka khun u Secretary MPSC kaba pyrshah pyllait paidbah ia ki marks

Syllad | The Rising MeghalayaAugust 3, 2024

Ka kynhun ki samla kiba la pass ia ka eksam MCS (Prelims) bad kiba ki kyrteng jong ki, ki la paw ha ka thup ba nyngkong jong ki 580 ngut ki kyrtong, ki la kynnoh ba ka khun jong u Secretary ka Meghalaya Public Service Commission (MPSC) ka dei napdeng kiba pynpaw pyrshah ia ka jingdawa jong ka Khasi Student’s Union (KSU) ban pyllait paidbah ia ki marks jong baroh kiba iakhun ia kane ka eksam MCS.

Ha ka shithi sha ki nongialam ka KSU ka kynhun jong kine ki kyrtong ki bym kwah pynpaw kyrteng na ka bynta ka jingshngain ki la ong, “Hadien ba la iohi ia ka jingmih khubor ba ka Seng ka la iakhun pyrshah ia ka jingleh bym hok jong ka MPSC ha kaba iadei bad ka eksam MCS, ngi la pyrto shisha ia ka sienjam kaba phi la shim ban ieng pyrshah ia kane ka jingleh bym hok ha ka jingjied ia ki MCS hapoh kane ka jylla Meghalaya.”

KI la ong ruh, “Ngi kwah ban pynpaw sha phi ba ha ka thup kaba ar ba la pynmih da ka MPSC hadien ba la shem ia ki jingbakla kumba la kam a ka MPSC, ka la don kawei ka kyrtong kaba dei ka khun jong u Secretary ka MPSC, kaba dei ruh kawei napdeng kiba ieng pyrshah ia ka jingdawa ka jong phi ban pyllait paidbah ia ki marks jong baroh ki kyrtong kiba iakhun ia ka prelim ba la pynlong ha u snem ba la dep. Ka dei kawei na ki hynriew ngut ki kyrtong kiba la soi ia ka shithi kaba pynpaw pyrshah ia kane ka jingdawa jong ka seng ban pyllait ia ki marks.”

Nalor kata kane ka kynhun ka la kynnoh ruh da kaba ong, “Ngi kwah ban pyntip ruh sha phi ba kane ka khun jong u Secretary ka la shah jied na ka bynta ka kam LDA ba la pynlong da ka MPSC ha kaba ia ka result la dep pynbna ha u bnai Naitung ba la dep, kane ka pyni ia ka jingsuhthied ka kam jied bahaiing ha ka rukom thungkam thungkam hapoh ka MPSC.”

“Kumta ngi kyrpad ia phi ban shim ia ki sienjam ban leh ei ei halor kane khnang ban pynthikna ba kan don ka jingjied kaba khuid ba suba ia ki MCS ba mynta bad ki ban wan kumjuh.Ngi kyrmen ba phin iai bteng ban iakhun bad pynkut ia baroh ki rukom thungkam da kaba pyrkhat shwa ia la ki jong kiba haiing hasem.”

Shuh shuh kane ka kynhun ki samla ka la ong ruh,” Ka jingiakhun jong phi kan long ka jingkyrmen ia ngi kiba angnud bad ki bym don jingiadei bad kino kino kiba trei hapoh MPSC hynrei kiba kwah ban long ki nongtrei sorkar ban shakri ia ka Jylla.

Ha kajuh ka por ki la kyrpad ruh ia ka Seng KSU ban shim ia kane ka shithi kum kaba kongsan bha namar kan iarap ia ka seng  ban sei madan ia ka jyrsieh hapoh ka MPSC.