Da ka single leg rai ka SSA bad ki klob ban pynlong ia ka SPL 2023

Syllad | The Rising MeghalayaMarch 10, 2024

Kyntang ia wai, la mih ka rai na ka jingialang hapdeng ki dkhot jong ka Tournament Coimmittee ka Shillong Sports Asociation (SSA) bad ki nongmihkhmat jong ki 8 tylli ki klob ba dei ban iakhun ha ka lympung ialehkai jong ka Shillong Premier League 2023, kaba wan na ka jingialang kaba la long mynta ka sngi ka 9 tarik u Lber 2024 ha ka shlem treikam jong ka SSA ha Polo.

Haba kren sha ki lad pathai khubor hadien ba la wai kane ka jingialang na ka liang u vice president bah Robert Dkhar ba dei artad u Chairman ka tournament committee, u pyntip ba hadien shiphew bnai ba la  ia ap khmih lynti, ka rai kaba la lah ban shim na kane ka jingialang ka long ba kane ka lympung ialehkai bna nam ka jylla kan sdang la kumno kumno ha ka 20 tarik mynta hi u bnai Lber

Shuh shuh u bah Robert u la iathuh ruh ba namar ka jingkhim palat jong ka por, la rai ba tang mynta ka kynti ba kane ka lympung yn khreh ban pynlong noh ia ka tang shi kylla ne single leg, tangba ki saw tylli ki kynhun kiba ioh khur kham bun ka point kin ioh pat ia ka kabu ban jam sha ka semifinal bad hadien kane yn pynbud pat ia ka phainal.

Nalor katta, ka jingialang kaba la long mynta ka sngi ka long ba la shim ruh pat ia ka rai ba naduh mynta ka kynti, yn nym don ki kynhun kiban shah pynhiar (relegate) na ka SPL, kaba mut ba ha ka samoi ialehkai kaban wan jong u 2024, kane ka lympung kan don noh 10 tylli ki klob ne kynhun kiban iakhun ha ka SPL.

Ka khusnam pisa ia ka kynhun kaba rah ia ka nam lahduh kan long 3 lak tyngka bad kaba wan ba-ar ne Runner’s Up kan ioh 1.5 lak tyngka.

Ka jingialehkai ba nyngkong jong kane ka lympung kan long hadpeng ka Nongthymmai S&CC pyrshah ia ka Rangdajied United FC, ia kaba ka por ban pynialehkai yn sa pyntikna pat ia ka kham hadien.

Kumban shu pynkynmaw ba ki 8 tylli ki klob kiban iakhun ha ka SPL 2023 ki long ka Shillong Lajong FC, Langsning FC, Ryntih SC, Nangkiew Irat Sc Ka Sawmer bad Ka Nongthymmai S&CC.