Da ka skhim CHI yn pyntreikam ban weng iaka jingeh ki ASHA

Syllad | The Rising MeghalayaNovember 23, 2023

Ka Sorkar Jylla haka sngi Balang kala kyntait ban pdiang ia ka jingdawa jong ki nongtrei ASHA ban kyntiew ia ka jingsiew ne honorarium na ka T.2000 sha ka T.5000 bad rai ban pyntreikam da ka skhim thymmai ba la tip kum ka Community based Health Incentive Sheme (CHI) khnang ban lah ban weng ia ka jingeh jong ki.

Lyngba kane ka skim Community Based Health Incentive Scheme, ka jingsiew iaki ASHA la kyntiew naka T.2000 sha ka T.3000.

Ia kane ka jingshim rai la pynpaw da ka Myntri ka Tnat ka koit ka khiah ka Kong Ampareen Lyngdoh ha ka jingialang bad ki nongmihkhmat na ka Meghalaya Accredited Social Health Activist Workers Union (MASHAWU).

Haba kren sha ki lad pathai khubor, ka Myntri ka la ong; “Ngi la wanrah ka jingtyrwa hakhmat u Myntri Rangbah ka jylla ha ka jingialang kaba la long ha ka sngi ba Ar ba la lah bad mynta ka sngi ngi la rai ban pyntreikam da ka skhim kaba thymmai ka ban iarap ban weng ia ki jingeh ha kaba iadei bad ki jinglut jingsep jong ki nongtrei ASHA ha kaba iadei bad k leit ka wan, kata kum ha kaba ialam ia ki nongpang sha ki jaka sumar. “Ngin pyntreikam da ka Community based Health Incentive (CHI) kum ka lad jingiarap halor ka jingdawa ka jong ki.”

“Kane ka dei ka lad jingiarap kaba thymmai kaba ngi sngew ba ka donkam ban pynioh na ka bynta ki ASHA. Kine ki kynthup ia ki bai lut bai sep jong ki ASHA ha ki jingtreikam ki jong ki, kata kaba kynthup halor ki lad jingiarap sha kito ki ASHA kiba lah ban trei bha kaba wanrah ruh ka jingduna ha ka jingiap jong ki longkmie armet bad ki khunlung ba dang kha,” ong ka Myntri kaba la bynrap ruh ba ka skhim CHI kan dei kaba  pyntreikam lyngba ki shnong bad ruh ka ban iaid ryngkat ryngkat bad kiwei pat ki kynhun kiba don bynta ki ban lah ban wanrah ka jingkylla na ka bynta ka jylla Meghalaya bad na ka bynta ki nongshong shnong ki jong ka.

Ka Myntri ka la pynbna ruh ba yn sa thaw ia ka committee hapoh ki district level ki ban khmih halor ki jingeh jong ki nongtrei ASHA khnang ban pynsuk ha kaba iadei bad ki jingtreikam.

Lah ban kdew ba ki jaka aijingsumar kiba don ha kumba 7000 tylli ki shnong ki la shah ktah jur namar ka jingsangeh treikam jong ki nongtrei ASHA mynta lah 17 sngi kynthih kum ka dak ban pynpaw pyrshah halor ka jingbym lah jong ka sorkar ban kyntiew ia ka bainong jong ki kaba ki la dawa ban kyntiew na ka T.2000 sha ka T.5000.

Ha kaba iadei bad ka jingdawa ka jong ki, na ka liang ka Myntri ka la ong; “Ngi la dep pynpaw ba lada ki ASHA ki long kiba kongsan ha kane ka bynta jong ka jingtreikam, ngin iakren bad ki hynrei u don pat u pud na ka bynta ka jingiakren. Ha ki 20 bnai kiba la leit, ka la don ka jingiakren bad baroh ki long kiba iaid beit. Hadien ki 20 bnai sa shisien pat ki la wan ban iakynduh ia ngi bad pynlong biang da ki jingiakhih. Ngi kwah ban iohi ba kum kine kin ym wan jia shuh.”

Shuh shuh haba pynpaw halor ka pay commission haba ka don ka jingpynkiew tulop ia ki nongtrei sorkar, ka Myntri ka la ong; “Ka dei ban don ka nongrim ha man ka por ba ki phah kyntiew ia ka jingsiew. Peit ia ki nongtrei sorkar, ka pay commission ha ka sorkar jylla kam ju jia khah khah kumba long ki kynhun kiba hap hapoh ka sorkar pdeng, hynrei ki bteng beit ia la ki kam ki jam.”

Ha kajuh ka por haba kyntu ia ki nongtrei ASHA ba kin trei tang 6 kynta ha ka por kaba ki laitluid, kata ym man ka sngi, na ka liang ka Myntri ka la ong; “Ngi don ia ki ANM kiba aijingkyrshan ia ngi ha ki shnong ki thaw, ngi don ia ki Mid Level Health Workers ruh ki ban kyrshan ia ngi ha ki jingtreikam. Baroh ki dei ban trei iala ki jong ki kam bad ban ym ban khia ia ki ASHA kiba long ki nongiarap lem ha ka jingtreikam.”

Ha kawei pat ka bynta na ka liang ka Myntri ka kyntu ia baroh ki ASHA ba kin leit ban bteng noh ia la ki jong ki kam ki jam naduh lashai ka sngi halor ka nongrim ba ka rukom treikam ka donkam ia ki. Nalor kata ka la maham ruh da kaba ong; “Wat shah ba ka sorkar kan shim ia ki rai kiba lah ban ktah ia ka kam ka jam ka jong ki.”