Da ka skim bylla 100 sngi yn ïarap ïaki lanot shlei um hapoh Thadlaskein Block ong u Wailadmiki Shylla

Syllad | The Rising MeghalayaJune 10, 2020

U Ma Wailadmiki Shylla, MLA jong ka Jowai Constituency ula ong “Ban kyrshan iaki paid nongrep ba shah pynjulor ki jaka rep jaka riang naka jingshlei um, ka BDO ophis Thadlaskein kan iarap iaki lyngba ka skim bylla 100 sngi ne ka MGNREGS kaba la tip kum ka Land Development.”

U MLA ka Jowai ula pynbna ia kane hadien ka jingialang kaba long hadpeng ka BDO Thadlaskein ka kong B Blah, ki MDC, ki nongtrei ka block bad ki MDC JHADC ba kynthup ia u Brightstar Chyrmang, Saron Pasweth, kiba long ki EM ka JHADC, u Wailad Bhoi Deputy Chairman JHADC, Lakhon Dkhar, Jesse Suiam, Octomewot Lamin nalor kiwei kiwei ban wad ki lad ban ïarap iaki paid nongrep kiba la shah ktah ki jaka rep hapoh Thadlaskein C&RD Block kaba long haka sngi Balang.

“Nga la rai ban synniang T.40 lak naka MLA skim sha ki 800 ngut ki nongrep hapoh ka constituency, hynrei haba la khein bha kane ka lad jingiarap ka dang duna bad la lap ka skim bylla 100 sngi lyngba ka Land Development, kaba dei kawei na ki mat treikam ka MGNREGS ruh lah ban ïarap,” ong u ma Wailadmiki Shylla.

U Ma Wailadmiki Shylla ula ong baroh ki nongrep ki dei ban phah ïaka aplikeshon sha ka BDO ha ryngkat ki dur jong ka jingjulor bad ki jait rep ba ki nongrep ba ki rep, khnang ban ïoh shim jingkhein bad ban pyntrei lyngba ka skim 100 sngi. Ula ong ba tang ka MLA skim ym pat ban pynbiang iaka jingdawa bad jingdonkam jong ki nongrep kiba la shah ktah bha ha kane ka jingshlei um kaba la wanrah ka jingjulor kaba bun bha hapoh District.

Shuh shuh u ma  Wailadmiki Shylla, ula ong ba hadien ba ula wan ïakynduh ïa u Myntri Agriculture ula pynioh symbai haduh 675 kg bad 225 Kg u symbai la dep ban pyllait sha ki nongrep bad la kyntu ia ki nongrep kiba donkam symbai bad kiba la ioh ruh hynrei kiba shah pynjulor haka jingshlei um ban wan shim iaki symbai n aka ophis Agriculture.