Da ka strike ba khlem buh por pynbna ka JHTOA naduh 6 tarik Nohprah

Syllad | The Rising MeghalayaDecember 2, 2021

Namar ka jingbitar halor ka jingleh khlieh shrieh ki karkhana dewbilat kiba la heh tang ka kular khlem pyntreikam iaka bai kit bai bah cement bad clinker, ka seng ki trai trok hapoh ka lama jong ka Jaintia Hills Truck Owner’s Association (JHTOA) ka la shim ïaka rai ban pynlong da ka strike kaba khlem buh por ka ban sdang naduh ka 5.00 baje mynstep jong ka 6 tarik une u bnai ban pyrshah iaki karkhana dewbilat ha Rilum Jaintia.

Ka JHTOA kala rai ban kan nym shah ia kino kino ki trok ban kit cement ne clinker na ki karkhana tad haduh ba kala ioh iaka jingdawa.

Ka JHTOA kala shim ia kane ka rai haka jingialang kaba long ha ophis treikam jong ka ha Tuber Takhniang, East Jaintia Hills District haka sngi Balang.

U nongïalam jong ka JHTOA u Ma Nidamon Chulet, ula pynpaw ka jingbitar ïaki trai karkhana pynmih dewbilat hapoh ka kynhun jong ka Jaintia Hills Cement Manufacturers Association (JHCMA) ba ki khlem pyntreikam ia kaei kaba kila kular na ka por sha ka por ïaki nongialam jong ka JTHOA.

Ula ïathuh ba haki khyndiat sngi ba la dep kine ki karkhana ki la mynjur ban ai ïaka dor bai kit thymmai kaba T.7 shi metric ton shi kilometre kumba la pynbna da ka sorkar Jylla bad kane ka dor la pynbeit ban pyntreikam naduh ka 15 tarik u Naiwieng, hynrei haduh mynta kim pat ioh iaka dor bai kit bai bah thymmai.

“Ka jingialang kala rai da ka wei ka sur ban pynlong iaka strike kaba khlem buh por naduh 5.00 baje jong ka 6 tarik une u bnai bad ngin nym ai lad ïa kino kino ki trok kit dewbilat bad kit clinker ban ïaid ha surok bah,” la ong u Nidamon.

“Ngi ki trai ri trai muluk kiba don trok ngi la shem jingeh bad ngim ïoh lad shuh ban kamai kajih na ka daw ba ki karkhana shna dewbilat ki la thied da ki jong ki trok kum ka Star cement ka la dep thied 250 tylli ki trok kumta ka pynlong noh ïaki trai ri trai muluk ban ïoh trip tang shisien haka shi taïew”, la ong une u nongïalam.

U Ma Nidamon ula kyntu ïaka sorkar Jylla ba kan tuklar ïa kane ka jingeh jong ki trai trok kiba kit ïaka dewbilat bad clinker khnang ba ki trai trok trai jylla kin myntoi.