Da ka takma ksiar khur ki samla ka Meghalaya haka football Khelo India Youth Games

Syllad | The Rising MeghalayaJanuary 31, 2024

Ki rang ialehkai ka Meghalaya ki la lah syndon ban ioh ban khur da ka takma ksiar ha ka jingiakhun ia ka final jong ka jingialehkai phutbol ka lympung ialehkai Khelo India Youth Games.

Kane ka takma ksiar ba ki samla ka Meghalaya ki la ioh ba kin khur ka la wan hadien ba ki la lah ba kin pynliem noh ia ka Punjab da 2-0, ha ka jingiakhun kaba la long hynne ka sngi ha Chennai.

Ha lyndet jong ka jingjop ka Meghalaya hapoh ka jingialam ka jong u bah Jeffrey Warlarpih ba dei ruh u Football Coach ka jylla, ka la wan hadien ba u Badondor Marbaniang u la lah ban ioh ban thep ia kine ki artylli ki kol ha baroh ki ar kylla jong ka jingiakhun, ha kaba ka kol kaba nyngkong leilei ka dei kaba u la ioh ban shut kham na jngai jong ka kol ka Punjab.

Ka lynti iaid ia ka kynhun ialehkai ka Meghalaya ha kane ka lympung ka long ba la pyniakap ia ka ha Group A ha kaba ka la lah shwa ba kan pynliem ia ka Uttar Pradesh da 4-1, ar sngi hadien kane ka jingiakhun, ka la lah pat ba kan pynliem ia ka Punjab da 2-1, bud pat sa ka jingjop pyrshah ia ka Tamil Nadu kaba long biang da 2-1 bad kine ki nam jop joit ka la pynlong ia ka ba kan bat ia ka kyrdan ba ha khlieh duh ka miej iakheiñ point bad jam sha ka semifinal.

Haka sngi Nyngkong, ka Meghalaya ka la hap ba kan iakhun tyngeh ban lah pat ban pynliem ia ka Jharkhand, kaba long hadien ba ka la dep ba kan shah tam shwa shakhmat.

Haba kren lyngba ka phone hadien ba la kut kane ka jingiakhun, u bah Jeffrey u sngew ban ainguh shwa ia U Blei Trai Kynrad uba la ri la da bad sumar ia u bad ia ka kynhun hi baroh kawei ha baroh shi lynter jong ka jinghiar ban aireng sha kane ka lympung, nalor katta um lah ruh ban khlem da ai khublei ia ka Meghalaya Football Association bad kumjuh ia Direcftor Sports & Youth Affairs ka sorkar jylla I kong Isawanda Laloo, IAS iba la shim lem ia ka bynta ban iarap ha kaban pynbit pynbiang ia ki jingdonkam baroh.

“Ha kane ka kynti nga nud ba ngan kam ba kum ka kynhun ka Meghalaya ha kane ka kynti ka dei ka team kaba khlaiñ bha ha kane ka lympung, ha kaba kam shim la don satia wat kawei ruh ka jingiakhun ban ong ba ka kynhun kan da shah tynjuh lait noh tang ha ka por ba ngi la iakhun ia ka semifinal,” la pynpaw u bah Jeffrey.

Nalor katta u la ong ba ka jingioh ban iashim bynta ha kane ka lympung ka wan lyngba ka MFA kaba la phah ia la ka jong ka kynhun ba kan leit ban iashim bynta ha ka lympung ialehkai jong ka Dr BC Roy Trophy, ha kaba kum ka kynhun ki player ka Meghalaya ki la lah ban ialehkai bha kampher wat lada kim shym la lah ban poi sha ka thong, hynrei kum ka kynhun ka la lah pat ba kan rung ha ka thup jong ka top team kaba biang pura ban pun lynti ia ka Meghalaya ba kan ioh ban aireng ha kane ka lympung jong ka Khelo India.

Haba phai sha ka jingiakhun ia ka phainal mynta ka sngi u bah Jeffrey u pynkynmaw ba kum ka kynhun ha ka por ba iakhun ha ka Group Stage ka la lah ban iakhun pyrshah ia ka Punjab, ha kaba ka rukom ialehkai ka jong ka hynne ka sngi kam shym la don satia kano kano ka jingkylla, katno tam lei lei haba kaneka kynhun kam lah bha ban ialehkai kumba ka dei ban long khamtam lei lei kum haka liang jong ka ball touch, pynban ka sur ne ka rukom ialehkai ka jong ki ka long pher bha  bad ka bym pat da dei palat katta ka kynhun kaba tbit.

Haba phai sha ki kol ba la ioh ban thep khamtam da u Badon, u bah Jeffrey u pynpaw ba la don ruh ki kabu ksiar baka kynhun ka jong u ka la ioh ia kaba kam shym la lah ba kan pynurlong ia ki sha ki kol, kaba hangne ki kabu ksiar kiba u Badon pat u la lah ba un ioh ban pynkylla pat sha ki kol ka long da shisha kaba yn hap ban ia pyrto ia kane ka sap kaba nhjylla ba une u samla u don.

Da kane ka jingjop kaba mynta ka sngi ka pynlong ia u bah Jeffrey uba dei artad uwei na ki coach ha ka Youth Development Cell jong ka MFA ba u nud ban kam syndon ba ha ki lympung ialehkai kiba kum kine, ka  jylla Meghalaya ka dei shisha kawei na ki jylla kaba khlaiñ bad u khmih lynti ba kine ki khynnah ba la ialehkai mynta kidei ki U-19 da kumta ha ki snem kiban wan dei kine hi kiban khreh naka bynta ban mihkhmat ia ka jylla wat ha ka kyrdan iakhun jong ka senior level.