Da ka workshop khot pynlong u MLA ia kiba iakhun kam pulit ha WJH; haduh 2800 kiba pynrung kyrteng

Syllad | The Rising MeghalayaJanuary 9, 2025

Ha ka sienjam kaba thmu ban iarap ia ki samla kiba thrang ban iakhun na ka bynta ka kam pulit – Meghalaya Police Recruitment 2024, u MLA ka Jowai u Bah Wailadmiki Shylla u la khot pynlong ia ka bynta kaba lai jong ka ‘Free Coaching Program’ ka ban sdang naduh ka 9 haduh ka 11 tarik Kyllalyngkot 2025.

Kane ka prokram ka thmu ban btin lynti bad iarap ia ki samla kiba don ka jingthrang ba kin lah ban pynkhreh ia lade na ka bynta ki eksam ki ban wan ha ka jingpynrung kam pulit ha ka Jylla.

Haduh palat 2800 ngut ki samla ki la pynrung kyrteng ia lade ha kane ka workshop, kata kynthup ia 1800 tam ha ka thup jong ki AB category, 700 tam ha ka UB bad 350 tam ha ka UBSI category.

Kine ki samla kiba la pynrung kyrteng na ka bynta kane ka workshop ka ban pynlong ha ki laitylli ki centre, kata ha Thomas Jones Synod College, Mihmyntdu bad Mukhla ki kynthup napoh East bad West Jaintia Hills.

Ki jingai jinghikai ki kynthup ia ki sobjek kum ka English, Maths bad General Knowledge, kata ia kiba la pynwandur katkum ka syllabus ba la ai da ka tnad ba dei peit.

Ka jingthmu ba kongsan jong kane ka prokram ka long ban btin lynti ia ki samla ki ban iakhun halor kaei kaba ki dei ban pule bad kaei kaba ki dei ban kiar katkum ka syllabus, ban iarap na ka bynta kito ki ban ialeh ia ka eksam DSC ka ban wan lem bad kiwei pat ki eksam iakhun kam bapher bapher, kumjuh ban kyrshan ia ki samla kiba wan na ki longiing baduk bad ki thain nongkyndong kiba duna ia ki kot pule bad ki lad jingiarap.

Ka long ruh kaba donkam ban tip ba kane ka prokram aijinghikai kam lah ban ai ka jingkular halor ka jingjop ha ki eksam ne na ka bynta ban pynthikna ha ka liang ka ioh kam ioh jam.

Kane ka sienjam ka pyni ruh ia ka jingshimkhia jong u Bah Wailadmiki Shylla ban pynkupbor ia ki samla ka jylla Meghalaya da kaba pynioh ha ki ia ki kor ki bor kiba donkam ban jop ha ki jingialeh ia ki eksam bapher bapher.

Kumta ruh ka imlang sahlang ka khmih lynti ban iohi ia ka jingseisoh jong kane ka prokram na ka bynta ka lawei jong ki samla.