Da ka Youth Conference pynlong ka KKC Seiñraij Jowai ban rakhe iaka lyngkhuh sngi iap U Kiang Nangbah

Syllad | The Rising MeghalayaDecember 29, 2023

Ki khun samla ka Niamtre na ki 18 tylli ki Seinraij bapher bapher ki la wan ban iashim bynta shitrhem haka jingiakynduh lang kaba tip kum ka ‘1st Kiang Nangbah Youth Conference’ ba la pyniaid da ka Khynroo Khyllood Committee (KKC, Seinraij Jowai ryngkat ka Lei Synshar Cultural Society.

Ia kane ka jingiakynduh lang ki samla la pynlong haka sngi Thohdieng ha Iungwalieh ka Dorbar Shnong Dulong haka jingdonlang u kongsan u Ma Pearlet Toi Chief Executive Officer, Meghalaya Khaddi Village Industry Board.

Kane ka jingiakynduh lang ki samla shynrang bad kynthei ka long shi bynta ka jingkynmaw burom iaka lyngkhuh sngi iap ba 161 snem jong u Khla Wait ka Ri Khad-Ar Dolloi U Woh Kiang Nangbah.

Iaka jingialang la pyniaid da u Ma Kamnipaia Challam General Secretary Lei Synshar Cultural Society bad la ioh ka jingnguh blei nguh syiem na u Ma Ebormi Suting dkhot KKC Seinraij Jowai.

U President ka Seinraij Jowai u Ma Hercules Toi haba kren shaphang u Kiang Nangbah, ula ong u Kiang Nangbah udei tang u nongrep uba dang samla bad haba u iohi iaki kam jong ka sorkar phareng ba ki lehbein iaki kynthei khynnah u shlur ban ieng pyrshah bad ka sorkar phareng.

Haba kren aimynsiem pat iaki samla, u Ma Toi ula kyntu iaki samla ban long ki samla kiba shlur namar ka por samla kadei ka por kaba kyrpang tam ba kin pynkhreh bha ia lade, la ka long haka pule dangle, ka wad kam wad jam ne haka ban noh synniang da ka jingshemphang, ka jingnang jingtip sha ka niam ka rukom, ka imlang sahlang, ka ri bad ka Jaitbynriew.

Shuh shuh ula ong ka por samla ka dei ka por kaba dang khlain bha ha ka pyrkhat pyrdain, ha ka bor met por phad, ha ka jingiohi jngai bad ha ka jingshemphang lada ki samla ki don ka mon bajwat ban leh ia kano kano ka kam ba bha naduh mynsiem kam don jingeh jingtynjuh kaba lah ban khanglad iaki.

U Ma Pearlet Toi haka jingkren ula ong ka 30 tarik Nohprah kadei ka sngi iam briew namar ba ka sorkar phareng kala shim ia ka jingim jong u Woh Kiang Nangbah.

Ula kyntu jur iaki samla kajuk mynta ban long kiba shlur namar ban im haka jingtieng jingsmiej ka imlang sahlang ruh kan sahdien.

Ki riew shemphang kiba la wan ban ai jingbatai iaki samla ki long u Ma Wansalan E. Dhar uba la batai halor ka phang ‘Kiang Nangbah kam u khon dap chynrang’, u Ma Chanhun Laloo uba la batai halor ka phang ‘Ki kam wa chemphang wa Tule iei suk ka patein’.

Hadien ka jingialang u kongsan ula thang iaka sharak kum ka dak ka jingsdang iaka 1st Kiang Nangbah Youth Conference’ ka ba yn pynkut haka 30 tarik Nohprah.