Da kawei ka sur rai ki waheh shnong ban ailad theh ñiut 3 bnai ha Mynkjai, weng ka Jowai iaka Quit Notice

Syllad | The Rising MeghalayaAugust 13, 2021

Ka Synjuk Waheh Chnong Jowai, Waheh Shnong War Jaintia bad ka Synjuk Waheh Shnong Ri Jaintia bad ka shnong Mupyut kila poi sha ka jingsngewthuh jingmut bad da kawei ka sur kila rai ban iatreilang bad ban ailad ban theh ñiut ka tnad Urban Affairs (Jowai Municipal Board) bad Jaintia Hills Autonomous District Council (JHADC) ha Mynkai na ka bynta lai bnai khnang ba ka sorkar kan ioh ka lad ban wad iaka jaka kaba biang ban theh ñiut haka sngi Thohdieng.

Ia kane ka jingialang la pynlong ha Enowell Hall, Amlarem haka jingiadonlang ki synjuk Waheh Shnong War Jaintia, Synjuk Waheh Chnong Jowai bad Mupyut bad ki 8 shnong kiba shah ktah na ka jingtheh ñiut ha Mynkjai.

Na kaliang ka synjuk waheh shnong Jowai da ka mynsiem kaba kmen kala rai ban weng iaka Quit Notice pyrshah iaka Mupyut bad ki shnong kiba pyrshah, ka Khasi Students’ Union (KSU) bad ka Synjuk Waheh Shnong War Jaintia kiba pyrshah iaka jingtheh ñiut ha Mynkjai.

Ia kane ka Quit Notice ka synjuk waheh shnong Jowai kaba kala pynbna haka 10 tarik une u haka jingiakhih pyrshah ban kynriah iaki ñiut na Jowai kiba la kylla lum bad sma iwtung ha ki iew ki hat ha Iawthymme, Ladthadlaboh, iawmusiang bad hajan Thomas Jones Synod College.

Katba iaka rai ban sangeh ïatreilang bad ka bor synshar district, West Jaintia Hills, ka synjuk waheh shnong Jowai kam pat rai eiei.

U Ma Alan Niangti, president Synjuk Waheh Chnong Jowai ula ong ba ia ka rai ban sangeh iatreilang bad ka bor synshar district West Jaintia Hills kin sa shong jingialang ha kine ki khyndiat sngi ban wan.

Shuwa ba kine ki synjuk waheh shnong kin poi sha ka jingiasngewthuh jingmut kala don ka jingialang jingialang u Myntri ka sorkar Jylla uba long ruh MLA ka thain War Jaintia ma Lahkmen Rymbui haka jingiadonlang u Deputy Commissioner, West Jaintia Hills, SDO Amlarem, CEO JMB bad ki shnong ba shah ktah na ka jingtheh ñiut ha Mynkjai naduh ka Moopyut, Umsalang, Madantyrpait, Muphlang, Skhenpyrsit, Moosakhia, Samanong, Pynthorlangteiñ bad ka Mustem.

U Waheh Shnong Mupyut, U Ma Chanky Kyndait, ula ong ba ka dorbar shnong Mupyut kala pyrshah ia kane ka jingtheh ñiut ha Mynkjai namar ba ki pyrshah iaka jinglehbymsuidniew ka JHADC bad ka JMB iaka shnong bad haka por ba ki iasoi soskular ruh la shu leh sop sop khlem ka jingtip jing ka shnong.

“Kane ka jingleh sop sop jong ka JHADC bad ka JMB kala pynbitar iaki nongshong shnong baroh kawei nalor baka jingbret ñiut katei ka jaka kalong kaba pathar bad thurmur ha kaba la bret katshaba lap ba shem kaba la ktah iaka koit ka khiah u briew bad ki mrad ki mreng bad ki pynthor hali jong ki nongshong shnong,” la ong u ma Chanky. Ula ong ruh ba da kawei ka sur kila rai ban ailad iaka JMB bad ka JHADC ban theh ñiut 3 bnai bad kadei ban long katkum ki kyndon National Green Tribunal (NGT) bad kadei ban pyndep iaka kamram hapoh kine ki lai bnai.

U Daniel Khongsit u president synjuk waheh shnong War Jaintia ula ong ba ka jingpyrshah ka jaka theh ñiut ha Mynkjai kadei kaba la neh la khamslem, hynrei mynta ka kynti kala jur bha ka pyrshah. Ula ong ba kane ka lai bnai kaba la ailad ka sorkar kadei ban pyndep iaka kamram ka jong ka.

Baroh lai tylli ki synjuk waheh shnong Jowai, War Jaintia bad ka Synjuk Waheh Shnong Ri Jaintia kila rai ban iatreilang ryngkat ryngkat ban wnarah iaka roi ka par jong ka West Jaintia Hills Disrtict.