Da ki 20 tylli ki mat tyrwa ka KSU ban wanrah jingkylla ha ki jingtreikam ka MPSC

Syllad | The Rising MeghalayaAugust 23, 2024

Ka Khasi Students’ Union (KSU) lyngba ka Employment Monitoring Cell ha ka 22 tarik Nailar ka la phah da ka jingthoh sha u Myntri Rangbah ka Jylla u Conrad K Sangma bad sha baroh ki MLA halor ki 20 tylli ki mat jingdawa jong ka KSU kiba thmu ban wanrah ka jingkylla ha ki jingtreikam jong ka Meghalaya Public Service Commission (MPSC) bad khnang ba kin ioh ban iatai ha kane ka Dorbar Assembly ka ban wan.

Kane ka la wan long ruh hadien ba ka KSU ka la pynpaw halor ka jinglap ia kiba bun bah ki jingdkoh ha ki jingtreikam jong ka Commission ha kine ki snem kiba la leit noh bad halor ka jingbym don shuh ka jingkhuid jingsuba ha ka thungkam thungjam.

Kine ki arphew tylli ki mat kiba ka KSU ka la tyrwa ki kynthup:

1. Ka jingthung ia ki Chairman bad ki Dkhot jong ka Commission da ki briew kiba shemphang bad ki bym don jingiadei bad ka sain pyrthei.
2. Ka jingpynbna man la u snem ia ki jingdon jingem bad ki jingkitkhlieh da ki nongtrei paidbah kaba kynthup ia u Chairman, ki Dkhot bad baroh kiwei pat ki nongtrei kiba trei ha ka Commission.
3. Ka jingthaw ia ka tnat peitngor bad ialeh pyrshah ia ka bamsap.
4. Ki nongaplai ki dei ban long ki nongshong shnong jong ka jylla Meghalaya bad ki dei ban nang ia ka ktien Khasi ne Garo na ka bynta kano kano ka post khnang ban lah ban apply ha ka MPSC.
5. Ka Combined eksam na ka bynta ki kam kiba don kajuh ka tulop bad ka kyrdan.
6. MCS/MPS bad kiwei kiwei ki kam ba dei ban pyniaid manla u snem.
7. Ka calendar man la u snem kynthup ia ki tarik ba kongsan na ka bynta ki eksamin ban pynmih da ka Commission.
8. Ka jingpynpaw paidbah ia ki marks ba la ioh da ki nong aplai ha kino kino ki eksam, kiwei kiwei ki test bad ka interview shimet na ka bynta kano kano ka kam ba la pynlong da ka Commission.
9. Ki roll nombor jong ki kyrtong ki bym dei ban pynkylla hapdeng ka jingpynrung kam.
10. Ym dei ban pynkylla ia ka rukom thung kam shisien ba la sdang ia ka kam.
11. Dei ban ai ia ki Carbon copy jong ka sla OMR sha ki nongialeh ne candidate.
12. Ka jingpyllait ia ki jubab (answer key) hadien ba la dep eksam bad ka por ba biang ban ai na ka bynta ban tuklar halor ki answer key.
13. Ka rukom thung kam dei ban pyndep hapoh 6 (hynriew) bnai naduh ka sngi ba la pynbna.
14. Ka jingpynduh noh ia ka “personal interview” na ka bynta ka Kyrdan B, C bad D.
15. Ka Personal Interview da kaba ring dur da ka camera na ka bynta ka Kyrdan A.
16. Ka kaiphod shisnem jong ka Commission ban pynbna paidbah.
17. Ki kot jingkylli ki dei ban long kiba kyrpang bha khnang ban lait na ka jinglait tuh ki jngkylli.
18. Ka jingthaw ia ka Cell jong ki jingujor ha ka Commission.
19. Ka Cadre ba kyrpang na ka bynta ka jylla Meghalaya.
20. Da ka computer based test na ka bynta ka lawei.

Ka KSU ka la wanrah ïa kine ki arphew tylli ki jingtyrwa  ban pynthymmai ïa ka MPSC hadien ka jingïamir jingmut bad ki nongshim bynta bapher bapher jong ka imlang sahlang kiba kynthup ïa ki ophisar ba la shongthait jong ka tnat treikam sorkar, ki riew shemphang, ki professor bad ki dkhot na ki Public Service Commission bapher bapher,” ong ka KSU haba bynrap.

Ka la ong ba ka Seng ka la peitngor ba mynta lah kumba 50 snem naduh ba kane ka Commission ka la mih, ym shym la don kano kano ka jingkylla ne jingpynkylla kaba treikam ha ki kyndon jong ka 1972 Regulations ki ban pynbiang ia ki jingdonkam jong ka juk kaba mynta bad kam don kano kano ka kyndon thung kam ne ki kyndon pyniaid eksam ban wanrah ia ka jinglong kajuh ha ka rukom thung kam kaba pynlong ia ka jingpynrung kam kaba thurmur bad ka bym khuid hapoh ka jingpyniaid jng ka Commission.

Ka memorandum ka la bynrap ruh ba ka KSU man ka por ka la ju rah ia kine ki mat kiba ïadei bad ka Commission sha ka Sorkar bad ha kine ki taiew ba la dep ka la pynlong ïa ki jingïakhih pyrshah ïa ki jingbym ïaid beit ha ka rukom thung kam ba la pynlong da ka Commission na ka bynta ban thungkam MCS , MPS, LDA bad kiwei kiwei.

Lyngba kum kine ki jingpyrshang ba la leh da ka KSU ha kine ki taiew ba la dep, kala lapdien ruh ia ki katto katne kiwei pat ki kam barieh hapoh ka Commission ia kiba donkam ban tuklar mardor.