Da ki Android tablets sam ka sorkar sha ki nongtrei ASHA ka Thadlaskein bad Laskein C&RD Block

Syllad | The Rising MeghalayaOctober 9, 2024

Ha ka sienjam kaba kongsan ban pynkhlain ia ki lad aijingsumar, ka District Medical and Health Officer, West Jaintia Hills, Jowai ha ka 8 tarik u Risaw ka la pynlong da ka prokram kaba kyrpang hapoh District Library Auditorium, Mynthong ha kaba la ioh ban sam da ki Android tablet sha ki nongtrei ASHA ka Thadlaskein C&RD Block and Laskein C&RD Block.

 Ha kane ka prokram la ia don lang u MLA Jowai uba dei ruh u Chairman ka MUDA u Bah Wailadmiki Shylla kum u Kongsan nalor u Deputy Commissioner u Bah  BS Sohliya, IAS  lem bad ki ophisar na ka Tnat ka Koit ka khiah kiba kynthup ia Dr. K Dhar, District Medical & Health Officer, Jowai, Additional DM&HO Dr. P Shylla, Dr. M Syngkon District Surveillance Officer Bah Rapki Shullai, District Health Manager National Health Mision, Dr. H Niang, BDO ka Thadlaskein C& RD Block bad kiwei.

Ha ka jingkren u Kongsan u la pyrto ia ka jingtrei shitom bad ka jingaiti lut jong ki nongtrei ASHA da kaba pynkan halor ka bynta ba kongsan kaba ki don ban kyntiew ia ka koit ka khiah naduh ka kyrdan kaba na trai eh. U la pyrto ruh ia ka jingtrei shitom jong ki ha kaba pynlong ia ka jingjurip bniah halor ka koit ka khiah, ban buddien ia ka koit ka khiah ki longkmie bad ki khunlung bad ban pynsngewthuh shaphang ki skhim sorkar bapher bapher kiba iadei bad ki lad jingsumar.

Nalor kata u la ong ruh ba da ka jingpyntreikam lyngba ki Android tablet, ki nongtrei ASHA mynta kin lah ban pyndep ia ki kamram jong ki ha ka lynti kaba kham suk bad kham bniah ban pynpoi ia ki lad jingshakri.U kyrmen skhem ruh ba kane ka sienjam kan kyntiew ia ki lad aijingsumar ha ka thain hi baroh kawei.

Ia ka Thadlaskein C&RD Block la aijingshakri da kawei ka Community Health Centre (CHC) bad laitylli ki Public Health Centre (PHC) ia kaba la kyrshan da ki 170 ngut ki ASHA.

Ka Laskein C&RD Block ka don kawei ka Health Centre (CHC) bad santylli ki Public Health Centre ba la kyrshan da ki 100 ngut ki nongtrei ASHA kiba shim ia ka bynta kaba kongsan ban pynpoi ia ka jingshakri ha ka liang ka koit ka khiah sha ki paidbah nongshong shnong.