Da ki Fan Park pynkhreh ka Sorkar na ka bynta ka Durand Cup semifinal hapdeng ka Shillong Lajong bad ka NEUFC

Syllad | The Rising MeghalayaAugust 25, 2024

Ka Sorkar Jylla ha ryngkat ki bor pyniaid jong ka North East Derby ka Durand Cup 2024 ki la shimkhia ha kaba iadei bad ka jingpynlong ia ka jingialehkai Semifinal kaba nyngkong ka ban long hapdeng ka Shillong Lajong FC pyrshah ia ka North-East United FC ha ka 26 tarik mynta u bnai hapoh JN Stadium, Polo Shillong ha ka por 5 baje janmiet.

Khnang ban pynthikna ba baroh ki paidbah nongkyrshan kin ioh ban sakhi ia kane ka jingialehkai nalor ki 15,000 ngut ki paidbah ki ban pyndap ia ka JN Stadium, ki bor sorkar bad ki bor pyniaid jong kane ka lympung ki la pynkhreh ruh da ki Fan Park ne ki jaka na ka bynta ki paidbah nongkyrshan ba kin ioh ban peit bad sakhi ia kane ka jingialehkai ha kiba buntylli ki jaka ha ka nongbah Shillong.

Na ka liang ka ophis jong ka Deputy Commissioner, East Khasi Hills, ki magistrates, ka tnad pulit ha ryngkat ki Dorbar Shnong ruh ki la iatreilang ban khmih na ka bynta ka jingiaid beit ha kaba iadei bad ka jingdie ia ki tiket ha kylleng ki jaka ha ka Nongbah Shillong ha kaba ki paidbah ki la ieng lypa ia u lain uba jrong naduh ka por mynstep watla ka jingdie tiket ka sdang naduh ka por 2 baje nohphai sngi jong ka 24 tarik ha kaba kiba bun bah kim shym la ioh tiket shuh.

Ka jingdie online ia ki tiket ha ka kylla kaba nyngkong ha ka 23 tarik ka la lut noh tang hapoh ka hynriew minit. Hynrei, ka jingdie online bad offline ha ka 24 tarik kaba bud ka la kut noh hadien ba la die lut ia baroh ki tiket. Ia kane ka jingdie tiket la pynlong ruh ha ki jaka sor jong ki District hapoh Ri-lum Khasi bad Jaintia.

Ia kine ki Fan Parks na ka bynta ki paidbah nongkyrshan la pynkhreh ha Mawlai Madan heh (stadium), ha R.V. Lyngdoh parking lot, ha Madan Malki Ground, ha  Umpling Maw-arling, Laitumkhrah Police Point Parking lot bad ha NEHU campus.