Da ki jhur ba thung hi bam ja sngi ki khynnah skul ha rilum Jaintia

Syllad | The Rising MeghalayaJanuary 3, 2022

Kum shi bynta ban pynthikna ba ki khynnah ki ïoh ïa ki jingbam ba tei met, ka Society for Urban and Rural Empowerment (SURE) ha ryngkat ka jing ïatreilang bad ka North East Slow Food and Agrobiodiversity Society (NESFAS), kila hikai ïa ki skul ban sdang ïa ki kper skul ha ki jaka ba lait hajan ki skul. Lyngba ka project “No one shall be left behind initiative” kaba la bei pisa da ka Rural Electrification Commission (REC) la ïarap ban sdang ïa ki kper skul ki ban ïarap ïa ki khynnah ba kin ïoh ïaki jingbam bateimet. Ki don bun ki skul kiba la sdang ïa ki kper skul ha ki skul jong ki, kiba ki khynnah kila ïoh ban bam ïa ki jingbam kiba bang, kiba khuid bad kiba tei met ha ki midday meal jong ki.

Lah ban pynkynmaw ba na ka liang jong ka sorkar ka lah ban pynbiang tang ïa u khaw, u dai, ka pylleng bad u phan ha ka jingbam ja sngi kiba ka ai ïa ki khynnah skul. Ka jingshisha ka long ba tang kine ki jingbam bala ai da ka sorkar, kim pat biang satia ban ai ka jingbam batei met ïa ki khynnah skul baduk jong ka jylla. Ba ki khynnah kin long kiba koit bakhiah ki dei ban bam ïa ki jingbam kiba tei met bad ka jingthmu ba kongsan jong kane ka kper skul ka long ban pynbiang ïa kita ki jingbam kiba ki khynnah ki donkam ba kin nangheh nangsan.

Ka jingthmu jong kine ki kper skul ka long ruh ban hikai ïa khynnah ba kin pynmyllien ban trei ïa ki kam rep bad ban sngewthuh ïa ka jingkordor jong ka jingtrei kaba pyndonkam da ki kti lajong. Kane kan pynïajan ruh ïa ki khynnah skul bad ka mariang kaba bsa jingbam ïa u khun bynriew baroh.

Kawei na ki skul kaba la ïaid shakhmat bha ka dei ka Cham Cham Wah SSA Lower Primary School kaba don haka shnong Cham Cham. Kane ka skul kala sdang ïaka kper skul ha ka snem 2019 bad ïa kane ka kper skul la peit la ïalam lynti da ka kong Yoona Dkhar kaba long ka nonghikai ha kane ka skul. Hadien ba ki la ïatrei shitom mynta kane ka skul ka la ïoh ban kheit ïa ki jhur kiba ki khynnah kila thung hi ha kane ka kper skul jong ki. Kine ki jhur kiba ki ïoh kheit mynta ki dei kiba kila thung naduh u bnai Risaw (October). Ïa kine ki jingthung la thung hadien ba ka  sorkar ka la shah ban plie ïa ki skul hadien ka lockdown.

Katkum bala ïathuh da ka kong Yoona Dkhar ïa kine ki jhur kiba ki la ïoh kheit na kane ka kper skul, ki shet ïa ki ha ka por ba ki ai ja-sngi (midday meal) ïa ki khynnah ba pule ha kane ka skul jong ki. Ka kong Dkhar kala ïathuh ruh ba ki jhur kiba ki ïoh kheit mynta ki long kum u salad, tyrso, muli, pathaw saw, mator bad kiwei kiwei. Ka kong Dkhar kala ong ruh ba naka liang ka ophis jong ka SURE ka ju hikai man ka por ïa ki nonghikai bad ki nongshet ja-sngi midday meal skul kumno ba kin lah ban pynbiang ïa kita ki san jait ki thup jingbam ha ka shi sngi khnang ba ki khynnah kin ïoh ïa ka met kaba koit kaba khiah. Mynta naka liang jong ka skul kala lah ban ai thikna ïa kita ki san thup jingbam kiba lah ban ai ka jingbam ba tei met ïa ki khynnah.

Naka liang jong ka skul kala pynkhreh ba lada jia ba ka lockdown kan wan biang, bad kin hap ban khang biang ïa ka skul, ïa kine ki jhur ki nonghikai kin leit kheit ïa ki bad leit sam ïa kine ki jhur sha iing jong ki khynnah skul. Na ka liang jong ka SURE ka sngew kmen ba ki skul bad ki nonghikai ki dang bteng ban rep ha kine ki kper skul wat la jingtreikam jong kane ka project kala kut ruh.