Da ki kymmor e ka Rotary Club cha kiwa chah sumaar ha Halfway Home, Jowai

Syllad | The Rising MeghalayaDecember 27, 2023

Ynne ka sngi ka Rotary Club, Jowai da saam ko ya ki kymmor cha kiwa chah sumaar ha Halfway Home kawa em ha Sabah Muswang, West Jaiñtia Hills.

Kani ka Halfway Home toh ka thaw sumaar ya ki bru wa em chitom hei bor pyrkhat ya kawa da pynlai da ka seiñ SURE wei da saam ya ki kymmor ha ka yalang wa emlang u President wa Vice President ka Rotary Club, Jowai.

U Dr. H.H. Mohrmen, Secretary ka Society for Urban and Rural Empowerment (SURE), da khana u kajiak chaphrang ka seiñ SURE wa ki kaam wa da leh ko heiwa na ki yntu tylli ki project ka Halfway Home toh i kreh wa khor bha.

Ka Niwanka Shylla, Project Coordinator ka Halfway Home Sabah Muswang, da khana ko wa ka yung bichaar wa khlieh dooh ka ri, ka Supreme Court, ha ka mukotduma Writ Petition (Civil) No.412/2016, hapyrdi u Gaurav Kumar Bansal pyrchah ya ka sorkar Uttar Pradesh da booh kyndon ko wow sumaar ya kiwa chitom hei bor pyrkhat.

Da khana ko leh wa ye u sumaar hadooh 25 ngut tangwa katni em 12 ngut.

U Rotarian SK Lato, Vice President ka Rotary Club da yaroh u ya ka SURE ya i chakri wa da e ko ya ki paidbah.

Neiliang u President ka Club, u Rotarian Deibormi Toi, da sñiawkhia u wa da sdang em boon kiwa chitom hei bor pyrkhat deiwa ekhublei leh ya ka SURE wa da chah ko ya ka Rotary Club wow kyrchaan yarap ya ka.