Da ki lama iong pynieng ka KSU ban pyrshah CAA, ka dei ka sngi kaba dum ia ka North East

Syllad | The Rising MeghalayaDecember 12, 2023

Ka Khasi Students’ Union (KSU) haka 11 atrik Nohprah, ka la rakhe ia ka Black Day ne ka ‘Sngi ba Dum’ na ka bynta ka thain Shatei Lammihngi (North East) da kaba pynlong da ka jingwah ia lama iong bad ki banar shibynta jong ka jingiakhih ba la khot pynlong da ka  North East Students’ Organization (NESO) ban pynpaw pyrshah halor ka jingpyntreikam jubor ia ka ain iakjakor, ka Citizenship (Amendment) Act, 2019 hapoh kane ka thain North East.

Ia kane ka jingrakhe la pynlong ha baroh ki hynniew tylli ki jylla ka thain North East, ha kaba ha ka nongbah Shillong, ka KSU ka la pynlong ia kane ka jingwah lama iong kumjuh ia ki banar kiba don ia ki jingthoh pyrshah CAA ha ki bynta jong ka Khyndailad bad kiwei pat ki bynta jong ka nongbah Shillong.

Ki katto katne ki jingthoh ki ong; “Ka 11.12.2019 haba ia ka CAB la pynkylla sha ka CAA, kane ka dei ka sngi kaba dum na ka bynta ki trai shnong riewlum ka thain North East, bad ka sngi ba phyrnai na ka bynta ki nongwan buhai shnong beain kiba dei ki mynder poiei. Na ka liang ka KSU ka dawa ruh na ka bynta ban thwet, ban pyndam bad ban pynphai pat ia baroh ki mynder poiwir kiba wan rung shwa jong ka snem 1971, ym dei ban ai jaka shongrieh ne ban pynlong ia ka NE ka jaka ban wan bret ia ki mynder ri poi ei.

Dang shen u Chairman ka NESO, u Bah Samuel B Jyrwa u la pynkynmaw ia ki nonshong shnong ka thain North East ba ha ka 11 tarik u Nohprah 2019, wat hadien ki jingpynpaw pyrshah da ki trai shnong riewlum jong ka thain pyrshah ia ka Citizenship (Amendment) Bill 2019, hynrei na ka liang ka Sorkar India kam shym la pynsngap bad ha kaba khatduh lyngba ka Rajya Sabha ka la mynjur ia kane ka ain iakjakor ia kaba la tip kum ka Citizenship (Amendment) Act 2019.

Nalor kata u la ong ruh; “Kane ka jingiakhih pyrshah ka dei ka khubor sha ka Sorkar India ban pynpaw ba ngi ieng pyrshah ia ka Citizenship (Amendment) Act 2019, bad ha kajuh ka por ban pynkynmaw sha ki paidbah halor ki kam leh donbor jong ka Sorkar India pyrshah ia ka mon jong ki paid riewlum ka thain North East,” ong u Bah Jyrwa.

Kumjuh na ka liang u President ka KSU u  Lambokstarwell Marngar u la ong ba ka rai jong ka sorkar pdeng ban pyllait ia kane ka ain CAA ha ki jaka ba treikam ka Sixth Schedule hapoh ka jylla Meghalaya ka dei tang ka buit ban pynbiej ia ki trai shnong riewlum ka jylla.

Watla katta u la ong ba ka nongrim kaba ka NESO ka ieng ka long ba ia ka CAA ym dei ban pyntreikam ha baroh ka thain North East kynthup hapoh kane ka jylla.