Da ki maw ki dieng shah pakhang lynti ki trok kit ñiut ka Jowai Municipal Board

Syllad | The Rising MeghalayaDecember 26, 2021

Wat hadien ba ka bor synshar district kala pynjari da ka kyndon aiñ 144 CrPC ban khang iaka jinglum paidbah bad rah tiar pynmynsaw, pynban u paidbah nongshong shnong ka thain Nartiang hapoh ka lama jong ka Elaka Nartiang Coordinate Committee kila mih puk ban pakhang lynti iaki trok ki ñiut ka Jowai Municipal Board (JMB) ban khang pyrshah iaka jingbret ñiut hajan ka shnong Sohphoh haka Sngi U Blei.

Ki paidbah kiba kynthup iaki longkmie longkpa bad ki sengbhalang kila mih puk bad leh bym salia iaka hukum kaba la pynjari u district magistor ban pyrshah iaka jingbret ñiut ka JMB kaba don ha Mooshutsdai Mookabeng hajan ka shnong Sohphoh da kaba buh da ki maw ki dieng.

Kane ka jingpyrshah jong u paidbah kala pynlong iaki trok jong ka JMB bad hap phet na katei ka jaka.

Kumban shu pynkynmaw, U District Magistor jong ka West Jaintia Hills District haka 23 tarik une u bnai ula pynjari da ka kyndon aiñ 144 CrPC ban tem ia kino kino ki jingkynad kaba lah ban ktah iaka shongsuk shongsaiñ hadien ba ki nongshong shnong ba marjan ka jaka bret thymmai kaba don hajan ka shnong Sohphoh kila pyrshah iaka jingbret ñiut ka Jowai Municipal Board (JMB).

U District Magitor ula ong ba ka ophis u Deputy Commissioner ha ryngkat ki tnad ba don bynta kala lum jingialang haka 8 tarik u Naiwieng 2021 bad la rai baka Jowai Municipal Board kan bret iaki ñuit kiba mih na sor Jowai ha kawei ka jaka shimet kaba don ha Mooshutsdai Mookabeng. Ka JMB kala iasoi ruh iaka soskular hadpeng ka trai jaka bad ka Jowai Muniicpal Board haka 9 tarik u Naiwieng 2021.

Ka hukum 144 CrPC kala khang pyrshah ruh iaki briew ban lum paidbah palat iaka 5 ngut bad ban rah ruh iaki tiar pynmynsaw kaba kynthup iaki dieng, maw, bad kiwei kiwei ki tiar pynmynsaw ha katei ka jaka bret ñiut kaba don ha Mooshutsdai-Mookabeng.

La bthah iaka Jowai Municipal Board ba kan pynthikna baka jingbret ñiut kan nym ktah iaka sawdong sawkun ka mariang.