Da ki Mobile Tablet la sam ka Sorkar sha ki nongtrei bad nongpyniaid ASHA ha Amlarem

Syllad | The Rising MeghalayaAugust 20, 2024

Ban kyntiew bad pynbha ia ka jingshakri ha ka liang ka koit ka khiah lyngba ki kor digital bad ban kyntiew ia ki nongtrei ka koit ka khiah ha ka prokram Aspiration Block ka Sorkar Jylla ka la ioh ban sam da ki Mobile Tablet sha ki nongtrei ASHA kumjuh sha ki nongpyniaid ASHA kiba hap hapoh Amlarem Civil Subdivision, ha ka jingialang kaba la long ha ka 19 tarik Nailar ha ka ophis jong ka Amlarem C&RD Block, Amlarem , West Jaiñtia Hills District.

Ha kane ka jingialang la ia don lang u MLA ka thain uba dei ruh u Chief Adviser sha ka Sorkar Meghalaya u Bah Lahkmen Rymbui kum u kongsan ha ryngkat u Subdivisional Officer ka Amlarem u Dr. Abishek Saini, IAS,  Block Development Officer, Amlarem Bah GLC Mylliem, Additional District Medical Officer Dr. K Dhar, District Nodal Officer Non-Communicable Disease Control Programme (NCDCP) Dr Maria Syngkon, Block Medical Officer Amlarem Dr Arvind Khonglah bad kiwei pat ki nongtrei ka tnad ka koit ka khiah.

Ha ka jingkren kum u Kongsan u Bah Lahkmen Rymbui u la ban jur ia ka jingdonkam kaba kongsan ia ka jingpeit bniah kaba khah khah halor ka koit ka khiah ne checkup. U la kdew ba kiba bun na ki nongshong shnong ha katei ka thain ki kham sngewtynnad ban iehnoh ia ki jingpeit bniah ba man ka por kaba iarap shibun ia ka jingkiew jong ki jingpang bapher bapher ki bym lah ban saphriang kum ka jingpang shini, ka jingpang high blood pressure, ka jingpang stroke bad kiwei kiwei.

U la batai ba ka jingbym lah ban lap kloi bad ban iada na ka jingpang ka wanrah ia ki jingeh kaba jur ha ka koit ka khiah ia kiba lah ban iada bad sumar. Kumta ruh u la kyntu ia ki paidbah ba kin kham shimkhia ban wad ia ka koit ka khiah.

Nalor kata u la ban jur ruh ba ka jingpyrshang jong ka sorkar kaba dang iai bteng ban pynbiang ia ki lad jingiarap kum kine ki tablet ka long shi bynta jong ka buit kaba khraw ban pynbha ia ka koit ka khiah bad ban pynthikna ba ki jingshakri kiba donkam kin poi wat sha ki jaka kiba kyndong tam.

Katba na ka liang u Dr. Dr. Arvind Khonglah u la ban jur ba ki Mobile Tablet ba la sam sha ki ASHA ha kane ka sngi kin ïarap shibun eh ia ka Amlarem Block ban pynurlong ia ki Aspirational Block KPI, kaban pynlah ia ki ASHA ban pyndep ia ka jingrung CBAC na ka bynta ka shnong bad ka thaiñ ka  jong ki.