Da ki spah ngut myntoi na ka jingai sumar ei ka NSS Unit ka Thomas Jones Synod College

Syllad | The Rising MeghalayaApril 15, 2023

Da ki spah ngut ki nongshong shnong ka Mihmyntdu kila ioh myntoi na ka jingai jingsumar ei ne ka free health check up kaba la pynlong da ka National Service Scheme (NSS) Unit jong ka Thomas Jones Synod College, Jowai haka sngi Saitjain.

Ia kane ka jingai jingaisumar ei la pynlong da ka jingiatreilang bad ka North Eastern Institute of Ayurveda and Homoeopathy, NEIAH Shillong ha iing dorbar ka Riatsaliya Mihmyntdu.

Ia ki nongpang la jurip da ka Dr. Sammaia Papiah Lecturer (Homoeopathy) bad u Dr. Mrigank Mishra Lecturer Ayurveda ryngkat ki 8 ngut ki samla Interns bad ki samla pule NEIAH. La iadonlang u Principal ka Thomas Jones Synod College, Jowai u Dr. D G Lyngdoh bad ki nonghikai ka kolej.

U Programme Officer NSS Unit u Wandy EH Lamin ula ïathuh ba ïa kane ka Health Camp la pynlong shibynta ka Special Camp jong ka NSS Unit Thomas Jones Synod College kaba la pynlong haki lai sngi lynter.

Ula ïathuh hashwa ka Free Health Camp kata haka 13 tarik bad 14 tarik une u bnai, ka NSS Unit jong ka kolej ka la pynlong ïaka Survey of Youth Not informal Education Or regular employment haka dong Lumpyrtuh Mihmyntdu na bynta ban ïit ïaki khynnah bad samla ki bym leit skul bad ïeh noh shiteng por ïaki jingpule jong ki.

Ula ïathuh 50 ngut ki Volunteer jong ka NSS Unit kiba la dep pyntbit ki rung haki 100 tylli ki thliew ïing jong ka dong Lumpyrtuh, Mihmyntdu ban pynlong ïaka Survey naduh ka rta 15 snem haduh 29 snem.

Ula ïathuh ba ka NSS Unit Thomas Jones Synod College ka juh pynlong ïa kiba bun jait ki program bad jingpynlong kum kine ki program ka plie lad ïaki samla pule ban don bynta lang haka imlang sahlang namar kumba ong ka ktien ka jingnang jingstad kamdei ban kut tang haki saw kynroh jong ka kamra klass hynrei ban pynïar ruh shaka imlang sahlang.

Ka Dr. Sammaia Papiah Lecturer (Homoeopathy) ka la ïathuh ba ki jingsumar la ai katkum ka jingdonkam ki paidbah khamtam ki jingpang kiba la mih na ki jingkylla ka mariang.

Ka khmih lynti ba kum kane ka jingai jingsumar yn lah ban pynlong sa kiwei de ki Shnong haki sngi ki por ban wan.

Ka la pynpaw ruh ka jingsngew nguh ïaka Dorbar shnong Mihmyntdu bad ki paidbah kiba la wan ban ïa shim bynta ban pynlong ïa kane ka prokram kaba jop.