Da ki spah ngut tur paidbah ki 21 shnong sha KHADC; khang syndon ia ka surok

Syllad | The Rising MeghalayaNovember 13, 2024

Da ki spah ngut ki nongshong shnong jong ki 21 tylli ki shnong na West Khasi Hills, ha ka 13 tarik u Naiwieng ki la tur paidbah sha ka ophis treikam jong ka Khasi Hills Autonomous District Council (KHADC) ban pynpaw pyrshah halor ka jingpynbeit pud thymmai ia ki constituency jong ka Council kaba la ktah jur ia kine ki shnong.

Kine ki paidbah kila pynpaw ka jingpyrshah kaba jur halor ka jingpynkynriah jong ka KHADC ia ki shnong ki jong ki napoh Mawshynrut constituency sha ka Rambrai-Jyrngam constituency.

Ia kane ka jingleit tur paidbah la lamkhmat da ka Joint Action Committee jong kine ki 21 shnong kiba hap hapoh ki laitylli ki polling station jong ka Misei, Mawsmai bad Langdongdai.

Da kaba rah ryngkat ki placard, kine ki paidbah ki la shong syndon ruh hapdeng surok iaid kali ha Garikhana kaba la wanrah ruh ia ka jingsahkut kali kaba jur hadien ba ki la shah khanglad ban ban rung jubor sha ka phyllaw ka KHADC.

Lah ban kdew ba dang shen ha ka jingialang ba long ha Langdongdai, kine ki 21 tylli ki Shnong bala lamkhmat da ka JAC kila rai ruh ban ym iashim bynta ha ka elekshon MDC ka ba lah ban long ha u snem ban wan.

“Ngi la shim ia kane ka rai ban pynlong da kane ka jingiakhih hadien ba ka KHADC ka la pulom ban shah shkor ia ka jingdawa ka jong ngi ban ym pynkynriah ia kine ki 21 shnong shapoh Rambrai constituency,” ong uwei na ki dkhot jong ka JAC haba kren sha ki lad pathai khubor.

“Ngi kwah ban iai neh hapoh Mawshynrut.Ym lah ban shu leh jubor ia ki hok ki jong ngi da ka Select Committee jong ka KHADC,” u la bynrap.

Na ka liang u Deputy Chief Executive Member uba dei ruh u Chairman jong ka Select Committee hadien u la khot ia ki nongialam jong kine ki paidbah ban pynlong ia ka jingiakren bad pynthikna ruh ban khmih bniah halor kane ka mat.

Hashwa kane u nongialam ka liang pyrshah u Bah Titosstarwell Chyne ruh u la iakynduh ia kine ki paidbah ba pynlong jingiakhih shabar jong ka Council.