Da ki spah tylli ïap ki syiar ha kyrpong Khliehriat CHC

Syllad | The Rising MeghalayaJanuary 25, 2021

U Ma Vesper Lamare na ka Shnong Khliehriat West ula ujor haka East Jaintia National Council (EJNC) Khliehriat West Unit haba ïadei bad ka jingïap ki syiar jong u.

U Ma Vesper Lamare uba dei uwei na ki nongri syiar bad ka jaka ri syiar jong u ka don ha kyrpong ka Khliehriat, Community Health Center (CHC) bad man ka por ki Syiar jong u ki ïap bad u kynnoh ba dei naka daw jong ka um jakhlia kaba wan tuid na CHC sha ka jaka ri syiar jong u.

Ula kynnoh ba da ki spah tylli ki syiar jong u kila ïap naduh ba ka um jakhlia umtngit jong ka Hospital ka wan tuid sha ki sem syiar jong u naka ka jingtwa ka kynroh kane ka jaka sumar.

Ka EJNC haka 21 tarik hapoh ka jingïalam jong u Shanborlang Bamon president EJNC Khliehriat, u Diamon Bareh general secretary EJNC Khliehriat kala leit ban jurip ïa katei ka jaka ri syiar jong u ma Vesper bad ka la lap ba ki sem syiar ki la dap da ki um jakhlia umtngit kiba sma iwtung bad shibun tylli ki syiar ki la ïap.

Ha katei kajuh ka sngi ka EJNC ka la buh da ka jingthoh shaki nongpyniaid jong Khliehriat CHC bad kyntu ïaki ban leit jurip hi dalade ïa katei ka jaka ri syiar bad ban siew ruh ïaka bai lutsan jong u ma Vesper.

U Dr Nidamon Pahoh Medical Superintendent Khliehriat CHC kaba la kyntait ban siew ïaka bai lutsan jong u ma Vesper Lamare, la ïathuh u Shanborlang Bamon President EJNC.

Ka JNC – KWU kan nym shong kli kti bad hadien ka Republic Day ka seng kan ïa kynduh ïa u DMHO & DC jong ka East Jaintia Hills District ban ïa kren sani halor kane ka jingiap kitei ki syiar.