Da ki ‘Street Angels’ yn ïakhun jaboh plastic ka Madankynsaw Mowkyndeng

Syllad | The Rising MeghalayaOctober 2, 2019

JOWAI: Ka Madankynsaw Mowkyndeng kala buh da ki ‘Street Angels’ ban ïakhun bad ban ïalap ïaki jaboh plastic hapoh shnong poh thaw baroh kawei.

Ka Dorbar Shnong Madankynsaw-Mowkyndeng haka sngi Balang kaba dei ka lyngkhuh snem ba 150 u Kpa jong ka Ri, u Mahatma Gandhi kala pynithuh paidbah ïa kine ki ‘Street Angles’ bad kine ki khynnah kiba ka shnong kala jied ban long ki ‘Street Angles’ kin mih sha surok manla ka sngi kumba shi shi kynta ban lum ban lang ïaki plastic ban hikai ïaki briew ban nym bret pathar ïa ki namar ba ki pynsniew iaka mariang.

Ka Dorbar Chnong jong ka Madankynsaw – Mowkyndeng kala rakhe ïaka lyngkhuh snem ba 150 u Mahatma Gandhi da ka jingpynkhuid shnong bad ka jingïakop lum plastic, ka khwai plastic bad kala sam ruh ïaki khusnam sha ki nongjop.

La ïalap pynsngewthuh ruh ïaki paidbah halor ka Swachh Bharat Mission bad pynbud ruh sa ka ïakop lum plastic ha kaba ka dong Pyrdi Chnong kala ïoh lum 83.36 kg, ka Knorsyiem 57.63 kg bad dong Newhill 37. 52 kg kiba wan ba ar bad ba lai.

Kala don ruh ka jing khwai plastic ha wah Tyngkla, kawei na ki wah duid ba shait pyndonkam ki nongshong shnong ban sum bad ban saitjain. Ha kane ka jingiakop la wan nyngkong da u ma Kitdor Shadap, ba ar u Lammiki Tyngkan bad ba lai da ka kong Ridahun Biam bad la ioh lum kumba 47 kg ki plastic na katei ka wah. Ia kine ki plastic la aiti sha ka tnad PHE.