Da ki tin bret ñiut synñiang ka KSU Jowai Unit sha ka Mihmyntdu bad Ladthadlaboh

Syllad | The Rising MeghalayaDecember 21, 2020

Ka Khasi Student Union (KSU) Jowai Unit ka la noh synñiang haduh 30 tylli ki tin sha ka Shnong Mihmyntdu Mookymphad bad Ladthadlaboh khnang ba ki nongshong shnong bad ki nongleit nongwan kin ïoh ban bret ïa ki ñuit ki ñier jong ki.

Ïa kitei ki tin ka KSU Jowai Unit ka la aiti haba ka ïashim bynta lang haka jingpynkhuid Shnong ba la pynlong da ka Dorbar Shnong Mihmyntdu haka sngi Saitjain ka taiew kaba la dep.

U President ka KSU Jowai Unit u Ewanmi Phawa ula ong, ka KSU ym tang ba ka peit ïaki jingeh jong ka ri bad ka jaitbynriew hynrei peit ruh ïaka jingkhuid jingsuba namar ka long kawei na ki lad ïada ïaka mariang.

Ula ong ruh ka jingnoh synñiang kum kine ki tiar sha kano kano ka shnong kadei ka jingïatreilang ka KSU bad ki nongshong shnong ha ka jingïadei ban wanrah ïaka khuid ka suba.

Shuh shuh ula ong ka KSU kam lah ban ïarap ïa ki shnong ne ki briew da ka pisa hynrei ka lah ban ai jingïarap lyngba ki kam kiba ïadei bad ka bha ka miat ne ka jingmyntoi ha ka imlang sahlang jong ka shnong ka thaw bad ka jaitbynriew hi baroh kawei.

Nalor u President la ïadonlang ruh u Ioanis Suchiang Vice President KSU Jowai Circle, u Phraki Howni Thubru General Secretary Jowai Circle bad kiwei kiwei ki dkhot jong ka KSU Jowai Unit.