Da kyndon aiñ 144 CrPC pyntreikam ha wah Umngot bad wah Umlew

Syllad | The Rising MeghalayaApril 26, 2022

Ka District Magistrate, East Khasi Hills District Ka Kong Isawanda Laloo katkum ka bor ba la pynkup haka hapoh ka kyndon ain Section 144 Cr.P.C, kala khang bad mana tyngeh ban pyndonkam ia ki rukom khwai doh kiba pynsaja ia ki kynja kiba im hapoh ka um ha ki wah Umngot bad wah Umlew bad la mana ruh ban thang khlaw beain ha kitei ki shnong kumba la kdew, kiba don hapoh jong ka East Khasi Hills District. 

Katkum ka hukum la pyntreikam da ka hukum 144 CrPC kalong hadien bala ioh iaka jingujor bad ka jingud jingnam na ka liang ki paidbah ba don ki briew kiba pyndonkam ia ki rukom khwai doh da kaba pynbthei bom, ki dawai bih, pynap jar/tyngsong bad kiwei kiwei ki rukom khwai doh kiba pynsaja ia ki kynja kiba im hapoh ka wah Rimen, ba iaid lyngba ki shnong; Umphniang, Um-hlew, Kalashandi, Shalai Malai, Iap Shynreh, Katraduwa, Dholai, Huru-Pukni, Joiram, Kharabri bad la iohsngew ruh ba don ka jingthang khlaw beain khlem ka jingsngewthuh bad ka jingkitkhlieh ha kitei ki shnong kiba hap hapoh ka Malai Sohmat Syiemship bad ka Bhowal Syiemship kiba don hapoh ka East Khasi Hills District.

Kine ki jingleh jong ki kan wanrah ia ka jingduhjait ki jingim hapoh ka um bad khyndew, ka jingjulor ka mariang bad nalor kata kan wanrah ruh ia ka jingma ia ka koit ka khiah jong u paidbah.

“Kum ki bor ba dei peit ia ki shnong ki thaw, nga kyrpad ba lada phi lap ne tip iano iano baleh  ia kitei ki jait kam kumba la kdew haneng sngewbha ban pyntip kloi sha kane ka ophis bad yn pynshitom ia ki katkum ka aiñ,” la ong Ka Kong Isawanda haka hukum kaba kala pynmih.

Kane ka hukum kan treikam mardor naduh ka 25 tarik Iaiong 2022 tad haduh ban da pynbna pat da kumwei.