Da lade leit jurip u MLA ka Jowai ia ka jaka pynlang bad pynkhuid um ka Tnat PHE
U MLA ka Jowai u Ma Wailadmiki Shylla haka 7 tarik Jylliew ula leit jurip dalade ïa ka jaka pynlang bad pynkhuid um (Treatment Plant) jong ka tnat PHE kaba don ha Urkhla Khimusniang, Jowai, West Jaintia Hills.
Kane ka jingleit jurip jong u MLA ka long ban tip halor ka jinglong jingman jong ka umbam umdih kaba pynpoi sha ki thliew ïing kiba don hapoh ka nongbah Jowai, namar ha kine ki khyndiat sngi kala don ka jingud jingnam da ki nongpyndonkam umkor ba ka um ka long kaba jakhlia bad sma iwtung bad ka bym long shuh ban pyndonkam.
![](https://www.syllad.com/wp-content/uploads/2024/09/JIT-Vacancy-823x1024.avif)
Ha ka jingjurip u MLA ula ïohlad ban ïakren bad iaphylliew jingmut bad ki ophisar bad nongtrei jong ka PHE halor kane ka jinglong jingman jong ka umkor. Ha kane ka jingjurip la lap ba ka umkor kaba pynpoi da ka PHE kala long kaba la khuid bad kaba la biang ban pyndonkam ïa ka.
Kat kum ka jingïathuh da ki ophisar ka PHE la ong ba ka jingjakhlia jong ka umkor ha kine ki sngi bala dep ka dei na ka jingjur palat u slap nalor ka jingbret pathar ïa ka khyndew ha kaba ka la don ka jingshah ktah jong ka Wah Myntdu haduh ba ka um kaba poi haka jaka pyllang bad pynkhuid umbam ha Urkhla kala kylla ktieh..
Ha kane ka jingleit jurip la synranlang ia u MLA da u EE jong ka tnat PHE Electrical u Ma P Synnah, u SDO Ma K Challam, ki katto katne ngut ki nongïalam shnong bad ki nongtrei na ka tnat PHE.
U MLA ula leit jurip ruh ïa ki kor tan um (Pump) ba pyndonkam ha kaba tan ïa ka umbam umdih ha kaba ula ai jingmut ruh ban pynbha shuh shuh ïa ki kor ki bor ba pyndonkam ban tan um, da kaba buh noh da kiba thymmai katkum ka juk ba mynta.
Kumba long mynta u MLA ula lap ba ka umbam kala long kaba la biang ban pyndap umbam ïa ki paidbah nalor ka jingdonlang jong ka umbam kaba wan na ka Wah Umngot.
Leave a Reply