Da leh burom ya ka 14th National Voter Day ha Jowai

Syllad | The Rising MeghalayaJanuary 26, 2024

Ka yung krehkam u District Election Officer, West Jaintia Hills haka 25 tarik Duiatra da pynman ko i leh burom ya ka 14^th National Voters Day dei wa pynman ya ki prokram wapher iwa dasdang nadooh i step da ka Cycle Rally kawa da chimbynta da ki dkhot ka West Jaintia Adventure and Cycling Association wei kawa da kaweh lama da u C.Syrti, MPS Superintendent of Police, West Jaintia Hills na madan Kiang Nangbah Stadium hei sakhilang u Khroobok Passah, DSO, West Jaintia Hills wa u W.Kharbuli, MCS, Asst. Commissioner, West Jaintia Hills.

Ha ka yalang kyrpang wan hei sngi wada pynman ha pchem ka yung krehkam iong u District Election Officer, West Jaintia Hills hei pynlai u WK Kharbuli, MCS Assistant Commissioner da emlang leh u BS Sohliya, IAS Deputy Commissioner, West Jaintia Hills, ki ADC kynthup yaka kong B Blah, u FB Basan, ka HML Kynta waka DV Lyngdoh wa u Assistant Commissioner S Phanbuh.

U BS Sohliya, IAS Deputy Commissioner hawa klam da khut kyrpad u ya waroh ki nongchong chnong kiwa da ioh u yachimbynta ha ki Elekshon wapher wow chimkhia ki u pyndep hok yei kamram iongki kam ki nongjied ya ki nongmihkhmat ha ka MP Elekshon kawa daw wan.

Chooh chooh da kyrsu kyntu u leh ya ki Waheh Chnong, ki yahkhmat iong ki chnong ki thaw wapher wow yakrehlang ki hei wow wanrah ya ka Elekshon kawa khooid wei laibeit lairyntih khlem em i awri awra wei sniaw yapher wei wow yait leh nei e ka wyrta Chula wa bakla cha ki paidbah khlem da ioh i tip wa sakhiat na ka yung krehkam u Deputy Commissioner.

Neiliang ka B Blah, MCS Addl. Deputy Commissioner hawa e ki kyntien yahkhmat da khana pynsniaw ko chaphang ki nongrim iong ka National Voters Day wei da ong ko leh wa ya kani ka sngi da leh burom ha waroh 230 tylli ki Polling Station wa em hapoh ki 4 tylli ki Constituency iong ka West Jaintia Hills wei da ekti ki ya ki Voters ID Card cha waroh kitu kiwa dang kynjooh 18 snem i rta wei. Ki Supervisors wa ki BLO da pynman leh i klam pynsniawthuh nae awareness ya ki paidbah wa chongchnong chaphang kammon u wanrah ya ka Elekshon wakhooid wei laibeit lairyntih lyngba ki Mobile Demonstartion Van.

Khana ko leh wa ha ka Elekshon MP wow wan ha waroh ki 4 tylli ki Constituency ki nongthap Vote em ki kamwa 1,66,728 wei ka theme iong ka National Voters Day ha uni u snem toh kawa ong “ Nothing like Voting, I vote for sure”.

Khatdooh chwa wow ioh ki kyntien khublei na u FB.Basan, Addl. Deputy Commissioner da em i pynkup burom wa kyrpang ya ka Chiiung, PwD Icon A. Lyngdoh, BLOs kiwa da chimbynta hei wow pynsniawthuh ya ki paidbah chaphang i kamram wei hok iong ki nongthap vote neitae i sam ya ki prize cha kiwa jop iong ka yakop dro dur ya ki People With Disability Voters ha ka phang wa ong ‘Election & Voting’, i ekti ya ki certificate cha kiwa yachimbynta ha ka Cycle Rally.