Da ka “Lockdown Karaoke Challenge” pynlong ka Faith Back Fan Club

Syllad | The Rising MeghalayaApril 23, 2020

Kum shibynta ban pynbyrngia ïalade ha kum kane ka por ba khang khyrdep (Lockdown) ban ïakhun pyrshah ïaka khlam COVID-19, ka Faith Back Fan Club lane ki briew kiba ieid bad kyrshan ïa ka kynhun nongtem #FaithBack kaba don ha Jowai, kane ka Fan Club ka la sdang da ka “Lockdown Karaoke Challenge” naduh mynta ka sngi.

Kane ka jingïakop ka dei tang na ka bynta ki nongshongshnong Meghalaya bad ki nongshimbynta ki lah ban rwai ha ka ktien Phareng, Khasi, Garo ne Pnar. Ban shim bynta ha kane ka jingïakop, lah ban pyndap ïa ka “online form” kaba la kdew haka www.facebook.com/modernexpressionsjowai bad ym donkam ban siew ei ei ruh em.

Ki nongbishar ïa kane ka jingïakop ki dei ki nongrwai bad nongtem ba pawnam kiba kynthup ïa u Lyngkit Lyngdoh bad u Heithmu Phawa na Jowai, u Danny Dann bad u Felix Langstieh na Shillong bad ka Albana Rimsu na rilum Garo bad yn sa ai da ki buskit ïa ki nongjop.

La ai por ïa ki nongshimbynta ban pyndap ïa ka form bad phah ïa ki Video jong ki haduh ka 30 tarik u Ïaïong 2020.  Kum ban pynshai, ha ka jingrwai Karaoke, ki nongrwai ki dei ban rwai bad ka ‘Track’ kano kano ka jingrwai ba ki la jied bad ym dei ban rwai-lang bad ka sur u ne ka nongrwai tynrai (original).