Da ka ‘Rice Festival’ yn pynlong ha Mukhap ban kyrsiew ïaki nongrep ban tyngkai ïa u symbai

Syllad | The Rising MeghalayaJanuary 23, 2020

JOWAI: Ka Society for Urban and Rural Empowerment (SURE) ha ryngkat ka jingïatreilang jong ka North East Slowfood and Agrobiodiversity Soceity (NESFAS), Shillong bad ka da jingkyrshan jong ka REC kan pynlong ïa ka ‘Rice Festival’ ban pynkhie im biang ïaki symbai kiba la jan duhjait haka shnong Mukhap kaba don hapoh ka Thadlaskeiñ Development Block, West Jaiñtia Hills district.

Kane ka tamasa kan long haka 25 tarik une u bnai naduh ka por 10 baje mynstep

Kane ka tamasa kan dei ka sien kaba nyngkong kaba la pynlong ha ka history haka jylla bad ha kane ka tamasa kan don ka jingpyni nam ïaki symbai kba bad khaw kaba kyrpang. U khaw da shisha u dei jingthung uba kongsan tam jong ki briew haka jylla, pynban kam ju don pat kano kano ka jingleh kyrpang na ka bynta une u jingbam ba kongsan.

Ha kane ka tamasa kaba shisngi ki don bun ki prokram kiba kynthup ïa ka jingpyni rong ïa ki symbai tynrai ïa kiba yn wanrah da ki nongrep kiba don ha kane ka thaiñ bad kumjuh ruh kiba  na kiwei pat ki thaiñ.

Ka thong ka long ban pynkhie im bad ban bat symbai biang ïa ki synbai tynrai kiba la jan duh jait. Kawei pat ka prokram ka long ba hadien jong ka jingpyni nam ïa ki symbai, ki nongrep ki ïa kylliang symbai pat paramaki (seed exchange program). Kan don ruh ka jingpyni ïa ki rukom sumar jingthung kiba leh da ki nongrep hi da kaba pyndonkam ïa ka jingtip tynrai bad ka sap kaba ki don.

Kawei pat ka bynta ha kane ka tamasa ka long ba kan don ruh ka jingïakop phawer bad ki phawer kin long halor ka phang kaba ïadei bad ki jingbam tynrai. Kan don ruh ka jingïadie ïathied ïa ki jingbam tynrai kiba yn pynkhreh da ki kynhun kiba don ha kine ki thaiñ. Kumjuh ruh kan don ka ïew ki nongrep ha kaban yn die ïa ki marrep kiba thung khlem pyndonkam dawai.

Kaba kongsan ha kane ka sngi ka dei ka tamasa jingrwai ha kaba ka Moreal Paswet ka nongrwai kaba pawnam jong kane ka jylla kaba la rwai ruh ka phlim Ïewduh kan pynsngewbha ïa kiba wan sha kane ka Rice Festival.

U H.H.Mohrmen, Secretary jong ka SURE ula ïawer ïa ki paralok ban wan ban ai mynsiem ïa ki nongrep jong ngi.