Da u kyrtong iamon lang rai pynieng ka UDP bad HSPDP ha ka election Lok Sabha ka ban wan

Syllad | The Rising MeghalayaOctober 31, 2023

Ka seng United Democratic Party (UDP) bad ka Hills State People’s Democratic Party (HSPDP) kila shim ia ka rai ban iatreilang kum ka kynhun synrop Regional Democratic Alliance (RDA) na ka bynta ban pynieng da u kyrtong iamon lang ha kane ka election Lok Sabha ka ban long ha u 2024.

Watla katta kine ki party riewlum kim pat rai satia ia ka kyrteng u kyrtong iamon lang, kata watla ki la don lai ngut ki kyrteng kiba la paw ba ki kwah ban iakhun ha kane ka election ka ban wan, kata kiba kynthup ia u President ka Khasi Author Society (KAS) u Dr DRL Nonglait, u Nongialam barim ka HYC Bah Robertjune Kharjahrin bad MLA barim ka UDP Bah Process T Sawkmie.

Haba kren sha ki lad pathai khubor u nongialam ka UDP u Dr. Jemino Mawthoh haka sngi Nyngkong ula kyntu ia kiwei pat ki seng riewlum ba kin iawan ban iasnohkti lang ha kaban lah pynmih tang ia kawei ka sur ban jied ia u kyrtong iamon lang.

“Lada ki don kiwei pat ki seng riewlum kiba kwah ban iasnohktilang bad ngi, ngi long kiba kloi ban iatreilang bad ki da ka jingiatylli. Ngi thrang ban iohi ban don ia ka jingiatylli lang jng baroh ki seng riewlum” ong u Bah Mawthoh.

Ula banjur ba ka UDP bad ka HSPDP, kidei ki artylli ki seng riewlum kiba la rim tam bad kidei ruh ki seng kiba don ia ka jingiatreilang kaba la slem bha na ka bynta ka bha ka miat jong ki paid riewlum ka jylla.

Haba kylli la ka la don ne em ka jingiakren bad ka seng Voice of the People’s Party (VPP) ha kaba iadei bad kane ka bynta, na ka liang u Bah Mawthoh ula pynpaw ba kam pat shym la don satia kano kano ka jingiakren bad kane ka seng.