Da u mot dur ïong u Woh Tep Kyndait u wai pynem burom ka Sein Raij Tuber, u Khlawait wa shah pyniap ha u syiem Jaintiapur

Syllad | The Rising MeghalayaJanuary 15, 2024

Ka Seiñ Raij Tuber lyngba u Ma R Harvis Phawa Rangbah Mansan (President) dei lang u Rangbah Longsan (General Secretary) u ma Jolby Sana, da khana ki wa daw wai pynem burom ko ia u Mot Dur (Statue) ïong u Woh Tep Kyrdait u wa man u Mar ïong ka Raij Tuber hei juh por u wa man leh u Khlawait ïong ka Rilum Jaiñtia haka 17 tarik u ni u bnai haka Tuber Kmaishnong hajan u Mot u Woh Tep hei por 10.waje i step.

Ha kani ka sngi shi bynta man ka wow wai pynem burom ia u Mot dur ïong u Woh Tep, hei juh i por da man ko leh ka lyngkhuh sngi iap wa 355 snem ïong u Woh Tep u wa da shah pyniap ha u Syiem ka Jaintiapur ha ka 17 tarik, Iaïong (Hei ktien Tuber) (Janaury) snem 1669.

U Woh Tep Kyndait man Oo, u bru wa em burom wei em i mynsien maïa Jait bru. Man u leh u bru wa satar wei i mynsien wa shlur wow ïeiñ ialeh iaki bru wa nabar kiwa wan thom bor ne leh bor iaka jait ka kynja ki khon ki Raïot ïong Oo kamjuh iaka thain pnar hi waroh kawi.

Kani ka sngi man ko ka sngi wakhroo wa kyntang ka sngi wow sah kynmoo ianom rata sha waroh ki khon ka Bri u Ynñiawtrep Ynñiawskum khamtam iaki khon ka Raij Tuber. Katwa kamtae kyrpad ia phi wow sñiawbha phi wow him ia kani ka kabu ksiar dei wa pynlait shynnam phi wow iawan lang ha kani ka sngi ka wom ioh bunsien de duh shisien donhi.

U Kongsan ïong kani ka sngi toh u Ma Sñiawbhalang Dhar u wa man kam u Deputy Chief Minister wa em burom ïong ka Sorkar Meghalaya. U Ma Kyrmen Shylla kam u Symbud Kongsan ha katae ka sngi u wa man leh u Minister wa emburom ka Sorkar Meghalaya. Daw em lang leh u ma Wailadmiki Shylla u MLA 2- Jowai kam u Special Guest , deilang u Ma Lasky Rymbai Deputy Chief Executive Member ka JHADC, u ma Lakhon Dkhar EM ka JHADC, u Dolloi Elaka Jowai u ma Puramon Kynjing, Dolloi Elaka Shangpung u Ma Chanki Langbang wa kiwi kiwi ki bru pawkhmat jong ka Ri Lum Jaiñtai.

Ha kani ka sngi daw ioh wow sñiaw ïei khana parom shaphang u Woh Tep Kyndait dei lang i Chad Tynre.

Katwa kamtae lyngba kani ka wyrta ka shulla dei mynsien wa sñiaw burom wei sñiaw maïa khut sñiawbha ia phi ki lok ki jor, ki kha ki man, najan wei najngai khamtam sha waroh ki Secretary Chairman iong ki Seiñ Raij Shnong hapoh ka Raij Tuber wow sñiawbha phi wow pyntip lang sha ki paitbah hapoh ka Seiñ Raij Shnong ïong phi. Pan map na phi ki waheh wasiañ wom ïe de u pynpoi daka jingthoh sha phi him wa kani toh nei bynta ia waroh lang.

Khut sñiawbha sha waroh ki President Secretary ïong ki Raij Wapher wapher hapoh ka Ri 12-Dolloi 30- phaw syiem hapoh ka Bri u Ynñiawtrep Ynñiawskum kamjuh ki kynhun kreh mon sniawbha, pynkut ka kyrwoh na u Ma R Harvis Phawa u wa man u Rangbah Mansan (President) ïong ka Raij Tuber.