Da u Sdie shah mait ki ar ngut, kynthup u Waheh Chnong Tuber Kmaishnong

Syllad | The Rising MeghalayaJanuary 9, 2024

Ar ngut ki briew kila shah mait da u Sdie haduh ban da mynsaw jur ha ka miet 3 tarik Kyllalyngkot haka shnong Tuber Kmaishnong, East Jaintia Hills District.

Kine ki ar ngut kiba shah mait da u Sdie ki kynthup ia u Waheh Chnong Tuber Kmaishnong u Micky Lyngdoh bad u Denis Lyngdoh secretary IVCS uba long ruh u Chairman Seinraij Shnong Tuber Kmaishnong.

Katkum ka jingujor ejahar kaba la mudui ha Ladrymbai Police Outpost haka 4 tarik une u bnai, kaba la ujor da u para u Waheh Chnong u Chelang Lyngdoh, ula iathuh ba kane ka jingjia kala jia haka por 11:30 PM haka 3 tarik Kyllalyngkot ha ka por ba u Micky bad u Denis ki thmu ban tem iaka jingklumar hapoh shnong Tuber Kmaishnong ka jaka kaba la tip kum ka Kamar Khlot, hynrei kyndit kynsan kila shah thombor.

La ong ba kine ki ar ngut kila leit sha katei ka jaka da ka jingthmu ban tem iaka jingiakynad, pynban la mih uwei u briew uba kyrteng Training Phawa na ka juh hi ka shnong na kawei ka kali Hyundai Creta ronglieh kaba don u number (ML-10-C- 5037) ryngkat bad u Sdie ula thombor naphang bad kawang ia kine ki arngut haduh ba kila mynsaw jur.

La iathuh ba u Denis ula shah kawang na ka bynta ka khlieh bad ula kyllon haka juh ka jaka bad um tip briew shuh.

U Chelang haka jingujor ula ong ba kane ka jingjia la suba ba ka jingthmu hi ka long ban pyniap ia baroh arngut kine ki nongialam shnong.

Baroh kine ki ar ngut la pynkit sha Civil hospital, lalong hadien pat la pynkynriah sha Supercare Hospital, Shillong ban ioh iaka jingsumar.