Da wai pyrda ka President Droupadi Murmu ya ka 5th Meghalaya Games ha Tura

Syllad | The Rising MeghalayaJanuary 15, 2024

Ka President iong ka Ri India Droupadi Murmu ynne ka sngi 15 tarik Duiatra da wai pyrda ko ya ka 5^th Meghlaya Games ha PA Sangma Stadium, Tura hei sakhilang u Lat ka Jylla Phagu Chauhan deilang u Chief Minister ka Jylla Conrad K Sangma, Meghalaya Legislative Assembly Speaker Thomas Sangma, MP Tura Agatha Sangma, Education Minister Rakkam Sangma, Sports and Youth Affairs Minister Shakliar Warjri, PHE Minister Marcuise N Marak, Power Minister A.T. Mondal nalor kiwi ki Minister wa ki heh Sorkar.

Kani ka 5^th Meghalaya Games man ko ka wow sahkynmoo sahkhanatang heiwa ka sien nyngkong da pynman ya ha Tura, ka sien nyngkong da pynman ya ka chabar na ka sor Shillong, ka sien nyngkong wa kynthuplang ya ka Rah Mookhrah, ka Dat Mooniaw wa kiwi ki Traditional Indigenous Sports wei ka sien nyngkong dawan wow wai pyrda da ka President iong ka ri India.

Ka Droupadi hei klam iongka da yaroh ko ya ki jaitbru ka thain Mihsngi ka Ri India kawa em chiboon ki bru emsap ha ki boon rukom khamtam ha ki kam yalehke sports.

Da ong ko leh hapyrdi I yapher ha ki waboon ki rukom kam ki bru wa chongchnong ka Ri India toh yn yaleh I u pynman ya ka Ri India kam kawi na ki ri wa bna nam ha ki kam yalehke Sports.

Chooh chooh ong ko ioosuk u peit yei man ka imlang sahlang iong ki bru ka thain mihsngi heiwa pynchlur ki ya ki khon kynthai khyllood wow yachimbynta ki ha ki kam yalehke sports.

Hei pynkut yei klam da kitbok kitrwiang wei e mynsien ko ya kiwa yachimbynta waroh dei wa ong iooluti wa na kani ka 5^th Meghalaya Games u mih ki bru emsap ki wow rah nam rah burom ya ka Jylla ka thain, ka ri ha ki yakop kiwa rap chajrong.

U Conrad K Sangma hei klam yahkhmat, da ong u wa I pynman ya kani ka lympung toh em ko chiboon I jingmut iwa ye u khrin u ktik wei u pynpsiah hei pyrkhat pyrdain wei man I sniw ki khon khynroo khyllood lyngba ki yakop ki prokram wapher kiwa ka Sorkar em ko I thrang I angnood wa ka thong wow leh yei wamiat wabha tam neibynta ki khon khynroo khyllood ka Jylla ki wow man ka Mynried iong ka Ri wa ka Jaitbru.