Daka check dam thymmai yn shna ban ïada ïaka wah Myntdu

Syllad | The Rising MeghalayaJanuary 18, 2021

Ka Jañtia Fishing and Environmental Protection Association ka dei kawei na ki seng kaba la treiborbah ban ïada ïaka wah Myndtu ha ki bynta kiba don haka shnong Jowai. Ka JFEPA ka long ruh kum rynsan kaba ïatreilang bad ki seng baroh kiba don hapoh Jañtia kiba ïaleh ban pynneh pynsah ïaki um ki wah bad ki dohum dohpnat kiba don ha ki. Kawei na ki kam ba hakhmat eh jong ka seng ka long ban pynneh pynsah ïaki dohkha kiba don ha Syntu Ksiar da kaba sdang ïaka Fish Sanctuary ne ka thwei psan dohkha hangne. Kala shna ruh bun tylli ki dam haka wah Myntdu ban ïada ïa ka wah naka jingpynjulor jong ki riew khwan myntoi shimet.

Ka Syntu Ksiar nalor baka dei ka jaka kaba don la ka jong ka jingiathuhkhana ka don jingïadei ruh bad ka parom shaphang ka jingïaleh ki Pnar hyndai pyrshah ïaka sorkar phareng. Mynta ka jingdon kane ka jaka psan dohkha kala nangkhring shuh shuh ïaki nongwan jngohkai pyrthei kiba wan sha kane ka jaka.

Ha ki por kiba la leit ka JFEPA haryngkat ka jingïatreilang bad ki bor sorkar kala leh shibun ki kam ban pynneh pynsah bad ïada ïaka wah Myntdu naka shah pynjot ha ki bor ki bym don jingsngewnguh bad burom ïa kane ka wah ka bsa um ïaka shnong Jowai bad ïaki pyntha kba ka pynthor neñ bad pynthor wah kib bsa khaw ïaki briew.

Ha kane ka kynti ka seng kum shi bynta ban ïada ïaka jingtuid jong ki jakhlia na ki bynta ka Ïewmusiang shaka wah Myntdu, ka Jañtia Fishing and Environmental Protection Association kala pynkhreh ban shna ïaka check dam ka ban khanglad ïaka jingtuid jong ki jakhlia sha ka wah. Ka Ïawmusiang ka dei ka ïew kaba heh tam ha Jañtia bad haduh mynta ki jakhlia kiba mih na ka ïew ki tuid sha ka wah bad kane ka buh haka jingma ïaki nongshong shnong jong ka shnong Jowai kiba pyndonkam ïa ka um  na kane na ka bynta ka jingdonkam jong ki baroh.

Mynta ka sngi ka JFEPA hapoh ka jingïalam jong u President jong ka u ma Lamwan Paswet, u Secretary ma N.K. Lamare  ryngkat bad ka komiti shnong jong ka dorbar chnong Tympang Ïawmusiang hapoh ka jingïalam jong u ma Eddie Stone Shylla bad u General Secretary ma Ajoy Lywait bad ki nongïalam jong kine ki ar kynhun kila leit ban jurip ïa ka jaka ha kaban tei ïa katei ka check dam.

Baroh arliang kila ïamynjur ïa ka jaka kaba biang bha ban shna ïa kane ka check dam ka dei ha Chahtngit kaba hap hapoh ka jingpeit jong ka dorbar shnong. U ma Lamwan Paswet President jong ka JFEPA ula ong ba ka pisa ban shna ïa kane ka checkdam ka dei kaba wan na ka MP Scheme jong u ma Vincent Pala bad ula ong ruh bad mynta ka seng kan sdang pyntreikam noh hi ïa kane ka projek.