Daka jingpynkhuid shnong rakhe WED ka VO Ïalong

Syllad | The Rising MeghalayaJune 4, 2022

Ka Voluntary organization (VO) jong ka shnong Ïalong kaba kynthup ïaki 29 ki Self Help Group (SHG) kiba don hapoh kane ka shnong kila rakhe ïa ka World Environment Day da kaba pynkhuid ïa ki lynti ki syngkieng jong ka shnong.

Haba kren lamkhmat ha ka jingïalang bap lie ïa kane ka jingpynkhuid shnong, ka kong Sngi Dkhar kaba long ka President jong kane ka VO kala ong ba ha ki snem kiba la lah ruh ka VO ka ju pyndonburom ïa kane ka sngi da kaba thung dieng hapoh ka shnong, hynrei ha kane ka kynti kila rai ban pynlong da ka jingpynkhuid shnong. Kala ong ruh ba ka VO mynta kala ïaid shakhmat bad ki kynthei hapoh jong ki SHG bad ki VO ki long kiba shlur ban pynïaid ïa ki kam jong ki seng jong ki.

Ka Rita Phawa kaba long ka Secretary jong ka VO haka shnong Ïalong haka jingkren pdiang sngewbha jong ka, kala ong ba ka VO kala ju pynlong hi ïa ki prokram pynkhuid shnong mynshuwa ruh bad ka kyntu ïa ki kynthei ba kin ïatrei khambha namar kane ka sngi ka long kaba kyrpang.

Haka jingkren kum u kongsan ha kane ka sngi u Dr H.H.Mohrmen ula pynkynmaw ba ka jingpyndonburom ïa ka WED kaba la sdang haka snem 1972 kala dap 50 snem mynta u snem. Wat la sanphew tylli ki snem kila ïaid ruh hynre ka jingdawa ban pynneh pynsah ïa ka mariang ka dang neh hi kumjuh. Ula ïaroh ruh ïa ka VO na ka bynta ki kam jong ka bad u pynpaw ïaka jingsngewkmen khamtam haba u ïohi ba ki kynthei hapoh kane ka shnong kila long kiba shlur wat ban ïalam ïa ki miting paidbah. U ong ba kane ka dei kata kaba ki ong ha ka ktien phareng ka ‘empowerment’ ne ka jingpynkup bor ïa ki kynthei. U kyntu ïa ki SHG ba kin long kiba ïatylli, kiba skhem jingmut bad khamtam kiba shai ha ki jingkheñ jingdiah khnang ba ki seng jong ki, kin ïaid shakhmat bad nangroi.  

Hadieng jong ka jingïalang plie ïa kane ka jinglehkmen WED, ki kynthei kila ïa mih paidbah bad pynkhuid ïa ka shnong da kaba sdang naka ïngdorbar jong ka shnong hi. Nalor ki dkhot jong ki SHG ki don ruh ki dkhot jong ki Producer Groups (PG) kiba la wan ban ïashim bynta ha kane ka jingpynkhuid shnong.