Daka video phah ka JNC sha ka sorkar halor ka jingjulor ki ar tylli ki project ba sahteng ka kam pule puthi ha East Jaintia Hills

Syllad | The Rising MeghalayaSeptember 21, 2023

Ka Seng Jaiñtia National Council (JNC) haka sngi Palei ka la phah syndon da ka video sha ki bor sorkar ha kaba iadei bad ka jingjulor jong ki artylli ki projek ki bym shym la pyntreikam shuh la bun bun snem hapoh ka thain East Jaintia Hills, kata kiba kynthup ia ka Residential school bad ka Teacher’s Training Centre.

Kane ka la wan long hadien ba ka JNC kala hiar sha Byndihati bad Umtyra ban leit jurip ia kitei ki ar tylli ki project kiba sahteng.

Ka JNC ka la ong ba ia kane ka Residential school la mang ne sanction ha u bnai Risaw 2015 bad la lah ruh ban pyndep ia ka building kumba la mang ha ki 24 bnai, kumjuh ruh ia ka Teachers training centre la mang ha u 2016 bad la lah pyndep ruh ia ki building jong ka, hynrei kaei kaba sngewsih kalong ba haduh mynta ym lah satia ban pyntreikam ia kine ki project ha kaba la shu iehnoh ia ki kumto.

Halor kane ka seng ka suba jur ruh ba ioh ka don kaei re kaei sha lyndet. “Haka jing jurip ka seng ka lap ba la pait lut ki iit ki jingkhang, la sakhi ruh ia ka jingshah rong bad shah tuh lut ki tiar ki tar bad la kyndang lut ia ki kril jingkhang iit bad la dap satang da ki klong bilor hapoh ka building.

Ka JNC ka la ong ba ka jingshah ieh jong kine ki building kalong pynban kumba ai lad ia ki nongleh kam sniew ba kin ioh rieh tngen ha kine ki jaka bad kane kan wanrah ka jingma bakhraw khamtam ia ki nongleit trei bylla bad ki nongrep ba iaid ba ieng na kine ki jaka.

Kumban shu pynkynmaw ba ha kine ki taiew ba la dep, kata ha ka 6 tarik mynta u bnai ka seng kala iakynduh markhmat bad u Dy CM u bah Sniawbhalang Dhar ban dawa pyntreikam noh mardor ia kine ki project, bad na ka liang jong u ruh u la kular ba hapoh shi taiew un sa khot jingialang hynrei haduh mynta ym pat iohi satia ia kano kano ka dak.

Na ka liang ka seng lyngba kane ka video kaba ki la ring ka la phah sha ka sorkar khnang ba kan peit hi da la ki jong ki khmat ban iohi ia ka jingshisha baroh. Halor Kane ka seng ka pynkynmaw biang bad ka kyntu jur ruh ia ka sorkar ba ka dei ban leh ei ei halor kane shuwa ba kine ki building kin julor lut bad khnang ba kan aijingmyntoi shibun naduh ki khynnah pule, ki samla wad kam, bad kan kyntiew ruh ka roi ka par ym tang ia ka thaiñ hynrei iaka jylla hi baroh kawei.