Dang ap ka Sorkar ia ka jingmynjur ka AICTE halor ka Shillong Engineering College

Syllad | The Rising MeghalayaDecember 21, 2024

Ka Sorkar Jylla ka dang bteng ban ap ia ka jingmynjur jong ka All India Councl for Technical Education na ka bynta ka Shillong Government College of Engineering ba kan sdang noh ia ka jingshim klas.

Haba pyntip ia kane ha ka 20 tarik Nohprah, u Myntri ka Tnad Pule Puthi ka sorkar Jylla u Rakkam A Sangma u la ong ba ka Tnad ka dang pynkhreh ha kaba iadei bad ki jubab halor ki jingkylli kiba la buh da ka AICTE.

“Mar ia pyndep ia kane ka sienjam ngin sa leit sha ka AITCE na ka bynta ban ioh ia ka jingmynjur na ka bynta ban sdang noh ia ka jingshim klas jong ka Engineering College” ula ong.

Katkum ka jingpynpaw jong u Myntri, ki jingkylli ba la buh da ka AICTE kham bun ki don jingiadei halor ka jingpynwan dur ia ki kamram klas, ka jingdon ki kamram bad kiwei pat.

“Ngi dang ialeh ban pynbiang ia baroh ki jingdonkam kiba iadei bad ki jingtei,” u la bynta.

Lah ban kdew ba ka jingpyntrei ia ka academic block, ki hostel ia ki shynrang bad kynthei la lah ban pyndep bad ia kaba la plie paidbah ruh da u Myntri Rangbah naduh ka 16 tarik Kyllalyngkot, 2023.