Dang ap ka Sorkar Jylla ia ka jingpynioh jaka na ki shipai ban pynkynriah ia ki Harijan na Them Metor

Syllad | The Rising MeghalayaJanuary 8, 2025

U Chief Secretary ka jylla u Bah DP Wahlang u la ong ba ka sorkar Jylla ka la kyrpad ia ka Sorkar Pdeng ban pynioh ia jaka jong ki shipai kaba don hajan Iew Mawlong khnang ban lah ban pynkynriah noh ia ki longiing Harijan kiba shong ba sah mynta hapoh Them Metor ha them Iew Mawlong.

Haba pynitp ia kane ha ka 7 tarik Kyllalyngkot, u Chief Secretary u la ong, “Kane ka kam ka dang don hapoh ka iingbishar jong ka Ministry of Defence. Kumta ngi khmih lynti ia ki ba kin ai ia ka jubab kloi katba lah bad ngi dang ap mynta ba kin ai jingtip biang sha ngi.”

“Ngi la dep ban kyrpad ia ka sorkar pdeng na ka bynta ban aiti ia ka jaka kaba rit bad kaba dang lait kaba la long trai da ki shipai hajan Iew Mawlong bad ngi la dep ruh ban pyntip sha ka Defence Ministry. Mar ia ioh ia ka jubab ngin sa lah ban pyniaid shakhmat,” ong u Bah Wahlang.

Nalor kata u la ong ruh ba ha u bnai Nohprah ba la dep u Myntri Rangbah ka Jylla ha ryngkat u Commissioner Secretary ka Tnad Urban Affairs ki la leit sha ka Defence Ministry sha Delhi na ka bynta ban iakren halor kane ka kam.

“Ngi la pynlong ia ki jingiakren bad baroh kiba don bynta ha kaba ki la mynjur ia ka jingtyrwa bad kaba kongsan ka long ba ha ka jingpynkynriah la pynthikna ba ka Gurudwara kaba don ha katei ka jaka ka ym shah ktah satia, bad lada ioh ia ka jingmynjur, kan long ka jingioh nong ia baroh kiba ia don bynta ha ka kam” ong u Bah Wahlang.

Haba jubab halor ka jingtyrwa ia ka jaka, u Bah DP Wahlang ula ong, “Ia mynta hi ngi lah tyrwa 2 akar ka jaka, hynrei ia katei ka jingdonkam lah ban pynduna noh mynta sha ka shi akar shiteng bad ban ialeh ban pyndonkam pura ia katei ka jaka katba lah”.