Dang ap ka Sorkar Pdeng ia ka kaiphod ka Inquiry Committee ban rai halor ka NEHU

Syllad | The Rising MeghalayaNovember 29, 2024

Ka Sorkar Pdeng ka dang ap ia ka kaiphod jong ka Committee ki arngut ki dkhot kaba pynlong ka jingtohkit halor ki jingkynnoh pyrshah ia u Vice Chancellor ka skulbah North Eastern Hill University (NEHU) u PS Shukla halor ka jingpyniaid kam ba bakla bad ka jingbym nangtreikam hashwa ban shim rai halor kane ka phang.

Ia kane la pyntip da u nongialam ka BJP uba dei ruh u Myntri sorkar u Bah AL Hek ha ka 28 tarik Naiwieng hadien ba ka kynhun na ka party ka Jylla ka la leit iakynduh dang shen ia u Myntri khynnah ka Tnad pule puthi ka Sorkar Pdeng ha Delhi.

“Ngi kum ka kynhun ngi la pynpaw sha une u Myntri bad ai ruh ia ka shithi halor ki kam kiba iadei bad ka NEHU. Ki la tip shai bha halor kane ka phang, bad ki la phah ia arngut ki dkhot ban tohkit halor kine baroh.Mynta ki dang ap ia ka kaiphod,” ong u Bah Hek haba kren sha ki lad pathai khubor.

“Katkum ka jingtip jong nga hi ka Committee ka la dep pynkhreh ia ka kaiphod hynrei kan dang aiti sha ka Tnad,” u la ong.

Haba kylli halor ka jingdawa ban weng noh ia u VC, u Bah Hek u la ong ba jan baroh ki kynhun hapoh kane ka skulbah kata naduh ka seng samla pule (NEHUSU), ki seng ki nonghikai (NEHUTA & MeTTA) bad ki nongtrei (NEHUNSA) ki la ai ia la ki jingmudui pyrshah ia une u VC ba mynta.

“Kumta lada kine ki jingkynnoh jong kine ki kynhun ki long kiba shisha bad lada phi dang pynneh ia u juh u VC kumta ruh ki kam ki jam kin ym long shuh kiba iaid beit iaid ryntih hapoh kane ka skulbah,” u la ong.

Kane ka la wan long ruh khyndiat sngi haien ba ki samla pule ki la pynsangeh shipor ia ka jingiakhih shah thngan kaba la neh haduh 16 sngi ban dawa weng noh mardor ia u PS Shukla kum u VC ka NEHU.

Baroh ki kynhun na ka skulbah NEHU ki la iakynduh ia ka Committee jong ki arngut ki dkhot ba la thung da ka Ministry of Education bad phah ia ka khubor kaba shai sha ka Sorkar Pdeng ba kin ym lah satia ban pdiang ia ka jingwanphai jong une u VC ba mynta.