Dang bishar bniah ka Sorkar ia ka jingtywa ban pynkha district thymmai haka Jylla: CM

Syllad | The Rising MeghalayaJanuary 12, 2025

U Myntri Rangbah ka Jylla u Conrad K Sangma ha ka 10 tarik Kyllalyngkot u la ong ba ka sorkar ka dang bishar bniah ha kaba iadei bad ka jingtyrwa ban pynkha ia ki District thymmai hapoh ka Jylla.

Haba jubab ia ka jingkylli halor ka jingdawa ban kyntiew kyrdan ia ka Sohra sha ka District kaba thymmai, u CM u la ong ba na ka liang ka sorkar ka la ioh pdiang ia shibun kiba kum kine ki jingtyrwa na ki kylleng ki jaka kaba kynthup ia ka Sohra bad ka Dadenggre.

“Ka long kaba shisha kumba nga ong ba ngi kwah ban pynjan ia ka jingshakri sha ki paidbah lyngba ka sorkar, hynrei ki don shibun ki jingeh kiba ngi iakynduh bad ngi don ruh ki jingeh ha kaba iadei bad ka jinglong jong ki jaka puta bad kiwei pat, kumta ngi hap ban bishar bniah ia kiba bun ki bynta,” u la bynrap.

Da kaba pynpaw ba ka jingeh ha ka kam pisa tyngka ruh ka dei kawei, u CM u la ong ba kam long satia kaba suk ia u ba un ai ia kano kano ka jingkular ha kane ka khep kaba mynta.

“Ka don ka jingktah kaba jur ha ka liang ka pisa tyngka. Kumta kam dei kaba ngin ong hooid ne em ia kane, hynrei kine ki kam ki dei kiba donkam ban bishar bniah bad ki don bun ki jaka, shibun ki briew kiba hap ban wanrah lang ha kajuh ka jaka, shibun ki rai ia kiba donkam ban shim, kumta ngi hap ban bishar bniah bha,” ong u Conrad.

Haba kylli la ka sorkar ka lah ne em ban ai ka jingmynjur ban pynkha ia ka district thymmai hashuwa u 2028, na ka liang u CM u la ong, “Ka dang kloi than ia nga ban ong eiei ia mynta hi”.