Dang bishar ka Sorkar ia ka jingtyrwa pynkha District thymmai bad Mawsynram Civil Sub Division

Syllad | The Rising MeghalayaAugust 28, 2024

U Symbud Myntri Rangbah ka Jylla u Bah Prestone Tynsong haka 28tarik Nailar u la ong ba ka sorkar Jylla ka dang bishar bniah ha kaba iadei bad ka jingtyrwa ban pynkha district thymmai bad ia ka Mawsynram Civil Sub-Division ha East Khasi Hills District.

Haba jubab ia ka jingkylli hapoh ka iingdorbar thaw ain, u Bah Prestone u la ong ba ka Sorkar ka dang bishar bniah ruh halor ka jingtyrwa ban thaw ia ki Community & Rural Development (C&RD) block.

“Ka jingthmu kaba kongsan jong ka Sorkar ka long ban pynkha district thymmai, Civil Sub-Division bad C&RD block,” u la ong.

Haba rah ia kane ka mat, u MLA ka TMC na Nongthymmai u Bah Charles Pyngrope u la ban jur halor ka jingdonkam ia ka sorkar ba kan pyrkhat na ka bynta ban thaw noh ia ka district kaba thymmai hapoh East Khasi Hills kaba long kawei na ki district kaba heh tam ha ka Jylla.

Katba u MLA ka UDP na Mawsynram u Bah Ollan Sing Suin ha kawei pat ka liang u la ong ba ka Mawsynram ka la don hok ban ioh ia ka Civil Sub Division namar ka jingdon briew ka la kham bun shah haba ia nujor bad ka Pynursla bad Ranikor bad kiba bun ki shnong ki dei kiba don ha ki jaka ba long riat kiba shem jingeh.

“Kumta dei tang ka Civil Sub Division kaba lah ban pyniajan ha ka synshar khadar sha u paidbah,” u la bynrap.

U Symbud Myntri Rangbah haba jubab ia kane ula ong ba ka jingtyrwa ban kyntiew kyrdan ia ka Mawsynram sha ka Civil Sub Division ka dei kaba dang shong bishar bniah da ka Sorkar.

“Hadien ba la dep ban bishar bniah ngan sa lah ban pynpaw sha u dkhot ka iingdorbar basd ki paidbah nongshong shnong ka Mawsynram,” u la ong.