Dang bun ki karkhana dewbilat ban ieng ha Narpuh, dep ai NOC u Waheh Shnong Wahiajer kawei, phah jingujor sha u Myntri tnad Commerce

Syllad | The Rising MeghalayaJuly 27, 2023

U Bah Cheerful Surong na ka thain Wahiajer Narpuh u la phah ka jingujor sha u Myntri ka Tnad Commerce & Industry Dept ka sorkar Meghalaya ban pynpaw pyrshah halor ka jingai NOC sha ka kompeni pynmih dewbilat kaba kyrteng ka ‘Bond Cement Company Ltd’ hapoh Wahiajer Narpuh.

Lyngba une u kyrwoh u la ong ba kum ki nongshong shnong jong ka Wahiajer Narpuh u la wanrah ia kane ka shithi jingujor pyrshah ia ka jingai NOC ne ka jingai jingbit na ka bynta ban wanrah ia ka cement plant bathymmai hapoh kane ka shnong ka lyngba ka ‘Bond Cement Company Ltd’ ha kaba ia kane ka NOC na ka shnong ka jong ki la ai bad mynjur da u Waheh Shnong u Ma Sibren Sumer khlem ka jingai jingmynjur da ki paidbah nongshong shnong.

Halor kane ka bynta u la ong ba na ka liang ki nongshong shnong ki la pynpaw ka jingpyrshah ban wanrah ia kane ka cement plant namar kane ka shnong ka dei kaba la kerkut lypa da kiba bun tylli ki karkhana pynmih dewbilat. La ong ruh ba ka jingwan jong kine ki karkhana dewbilat hapoh ka shnong bad ki shnong ba marjan ka long lyngba ka jingkular ha ka liang ka ai kam ai jam bad ban kyntiew ia ka roi ka par jong ki shnong ki thaw, hynrei kaei kaba ki sakhi ka long ba ki la nang wanrah pynban ia ka jingjulor ia ka mariang, ka jingduh ki tyllong um bad ka jingjakhlia jong ka lyer.

U la ong ruh kaei ka ban jia ia ka shnong ka jong ki bad ki shnong ba marjan lada kiba kum kine ki karkhana ki dang iai wan. Ka jingieng pyrshah halor kane ka jingthmu ban wanrah ia kane ka karkhana dewbilat ka long ruh halor ka nongrim jong ka jingshah ktah jong ka mariang kumjuh ia ki jingthung jingtep, ki mrad ki mreng bad khamtam ia ki briew.

Nalor kata u la ong ruh ba katkum ki jingtip ba ki la ioh ki dang don shibun ki kompeni kiba thmu ban sdang ia ki karkhana treikam ha kane ka thain, bad ka jingsngewkhia ka long ba kane kan nang pynjulor shuh shuh ia ka mariang bad ia ki sawdong sawkun jong ka. Ka jingpule bniah katkum ka saian la pynhisha ba ki karkhana dewbilat ki dei ki nongnoh synniang ba hakhmat eh ha kaba iadei bad ka jingduh jong ki khlaw ki btap tang ha i por ba khyndiat, bad ka jingnang bun jong kine ki karkhana hapoh ka thain kan pynlong ia ki jaka khlaw ka thain Narpuh ba kin duh kin dam noh tang hapoh ka 5 bad 10 snem ki ban wan.

La ong ruh ba ka jingwan jong kine ki karkhana kan nang pynkhluit ia ka jinglong jingman ha ka mariang hapoh ka thain Narpuh kaba ha ki shiphew snem kiba la dep ka long hapdeng 24-26 degree Celsius ha ka lyiur bah, hynrei ia kaba mynta ka la kiew shaduh ka 30 degree bad palat namar ka jingpynmih jong ki karkhana dewbilat ia ka Carbon dioxide. Kumjuh kane kan wanrah ruh ka jingjulor ia ka rep ka riang kaba long ka tyllong jong ka jingim na ka bynta ki nongshong shnong.

Shuh shuh ha ka jingujor la pynpaw ruh ba ka jingwan jong kine ki karkhana kam shym la iarap satia ban kyntiew ia ka roi ka par ne ha ka ioh kam ioh jam hynrei ka la wanrah pynban ia ki jingpang jingshitom.

Kumta ruh halor kine ki nongrim ba la kdew haneng la kyntu ia une u Myntri ba un shim khia lem halor kane ka bynta hashwa ba kane ka ophis kan ai ia ka jingbit na ka bynta ki karkhana dewbilat bathymmai hapoh kane ka shnong ka jong ki ia kaba kin iai bteng ban pyrshah jur.