Sdang ka jinghikai iaki khynnah kiba shah jied naka prorkam ïit sap ialehkai ka MSOA & tnad Sport ha SAI

Syllad | The Rising MeghalayaApril 1, 2023

Ka Elite Pathway Programme (EPP) ka prokram ai jinghikai kaba lai sngi bala pynlong da ka Meghalaya State Olympic Association ryngkat ka jingiatreilang bad ka tnat Directorate of Sports & Youth Affairs kala sdang haka shlem ai jinghikai jong ka SAI, STC, Shillong kaba don ha kut ka skul bah pule NEHU haka sngi Saitjain.

U bah AL Hek, Myntri sorkar ba dei khmieh iaka tnad Animal Husbandry & Veterinary bad kiwei kum u kongsan ula plie ia kane ka prokram ai jinghikai haka jingiadonlang Chief Secretary ka sorkar jylla u bah DP Wahlang, IAS, ki nongialam ka MSOA bad kiwei kiwei.

Ki nongwan jinghikai dei u Ian Campbell naka  EDGE10, ryngkat ka jingiadon lang u rang ialehkai phutbol ba la paw ka ri Denmark bad ba la mihkhmat ia ka Manchester United u Jesper Olsen ba la don bynta ha kane ka kynti na ka liang ka kynhun jong ka Future Football.

Ki nongialehkai ba la poi sha kane prorkam kidei tang kito ki 200 ngut na ka 4500 ngut kiba la iashimbynta ha ka prorkam iit sap ialehkai kaba la pynlong ha baroh ki distrik jong ka jylla ha ki sngi bad bnai kiba la leit noh.

Ka jingpyrshang ia ki khynnah ha kane ka camp ka kynthup ia ka vertical jump, compass drill, 10m ladder run bad ka 20m sprint, katba na ka liang u Olsen pat u shim ia ka bynta ban iarap ban sam iaka jinghikai bad jingtip shaphang ka  phutbol.

Haba kren kum u kongsan, U bah AL Hek u dap da ka jingkyndit bad bym lah ban mutdur satia ban shem bad iohi ia katta ka buit bad ka rukom ban test ia ki khynnah ban sain dur ia ka lawei ialehkai kaba pura ka jong ki ka long kaba la pher bak lybak. U bah Hek u kyrmen ba shisien ka sngi ka jylla kan sa lah shisha ba kan sei ia ki khlur ialehkai ba kynsai bad kiba lah ban wanrah ia ka nam bad burom ia ka jylla, ia la ka iing ka sem bad ha ka juh ka por ban pynpaw hakhmat ka pyrthei ba ka Meghalaya ruh ka lah lem ban sei madan ia ki nongialehkai bat bit ba dba kynsai.

Katba na ka liang u bah DP Wahlang, u sngew ban ong ba ki nongialehkai ha ka juk kaba mynta ki long kiba donbok, namar ki ioh ia ka kabu ba kin iaid lang ryngkat bad ka juk jong ka technology.

U bah Wahlang u la kam ruh ba 40 snem mynshwa, ma u ruh u la poi ban iashim bynta lem ha kum kine ki rukom jingpyrshang ha Patiala, hynrei ha kito ki por ki jong u, ki kor ki bor ba la pyndonkam ki long kiba dang duna bad tlot bor bha lad aia nujor bad ki kor ki bor kiba ha kum kane ka juk kaba mynta. 

Ha kane ka sngi la ioh ruh ia ka jingkren maitphang ba la ai da u working president ka Meghalaya State Olympic Association (MSOA) u bah John F Kharshiing, uba la ai khublei ia ka sorkar jylla halor ka jingiarap bad kyrshan lem na ka liang ka jong ka ban lah ban wanrah bad ban pynlong ia kum kane ka prokram hangne hapoh ka jylla, khlem da klet ruh ban pynpaw ia ka  jingai khublei ia ka sorkar, kaba la wan shakhmat ban sdang ban ai iaka bai bam (scholarship) ia ki khynnah ialehkai bad ki song khusnam pisa ia kiba ioh ban khur ia ki takma na ki lympung ne rynsan bah ialehkai ba long ha ka thain, ha k ri ne wat shabar jong ka ri.

Katba na ka liang u Ian Campbell u la pynpaw ba hakane ka kynti kaba mynta la don ki khynnah kiba ym tang ba ki pynpaw ia ka jingtbit ne ka sap ba ki don, pynban ki la pynpra ruh wat ia ki rekod bad u ban jur ia ki khynnah ban long kiba minot bad ba trei shitom.