Dang pynbeit ka Sorkar halor ka jingpynlong ia ka elekshon sha ki lai ADC 

Syllad | The Rising MeghalayaAugust 29, 2024

U Symbud Myntri Rangbah uba  khmih ruh ia ka Tnad District Council Affairs (DCA) u Bah Prestone Tynsong haka 28 tarik Nailar u la ong ba ka jingpynbeit halor ka phang kaba iadei bad ka jingpynlong ia ki elekshon sha ki laitylli ki Autonomous District Council (ADC) ka dang iaid shakhmat.

Katkum ka jingpynpaw ka jong u, ka jingpynbeit ia ka tarik ban pynlong ia ka elekshon sha ki ADC ruh ka la iaid shakhmat.

Kumba ka long mynta ia ka samoi treikam jong ki artylli ki ADC ha Khasi bad Jaintia Hills ruh la pynjlan da haduh hynriew bnai bad ka ban sa kut ha ka 5 tarik u Nailur u ban wan.

Ha kaba iadei bad ka jingdonkam ban shah pyndonkam ia ka ktien trai shnong ha ka por ka jingpyntian smai ha ki MDC bathymmai, u Bah Prestone u la ong haba jubab hapoh ka iingdorbar ba ka Rule 37 jong ka Assam and Meghalaya Autonomous Districts (Constitution of District Councils) Rules, 1951 (Amended) ka shah bad ailad ia ki dkhot ba ki lah ban kren hapoh ka Council da kano kano ka ktein ba kren ha ka thain kaba hap hapoh u pud u sam jong ka Council lane kino kino ki jait ktien ba la ithuh hapoh ka Jylla.