Dang pynbeit ka UDP, HSPDP ban iatreilang shwa ka MDC elekshon

Syllad | The Rising MeghalayaDecember 10, 2024

Ka United Democratic Party (UDP) bad ka Hill State People’s Democratic Party (HSPDP) kiba don ha ka lama jong ka Regional Democratic Alliance (RDA) kin iakynduh biang ha ka 11 tarik Nohprah ban shim ia ka rai kaba khatduh la kin iatreilang ne em ha kane ka elekshon MDC ka ban wan sha ka KHADC bad JHADC.

Hadien ka jingialang jong ka RDA, u Working President ka UDP uba dei ruh u MDC ka Sohra u Bah Titosstarwell Chyne u la ong, “Ngi la rai ban iakynduh biang ha ka 11 tarik Nohprah ban shim ia ka rai kaba khatduh halor kumno ban iaid shakhmat ha kaba iadei bad ka elekshon MDC ka ban wan, kata la kin iatreilang kum ka kynhun ne ka jingpyrkhat da kaba ia sngewthuh jingmut ha ka rukom pynieng kyrtong ha la ki jong ki constituency bapher bapher.

“Ngin iakhun na baroh ki 29 tylli ki seat. Ngin don ia ka jingsngewthuh jingmut bad ki paralok jong ngi, ka HSPDP ha ki katto katne ki constituency bad ia katei ka rai yn sa shim ha ka 11 tarik Nohprah,” u la bynrap.

Da kaba pynpaw ba ka RDA ka don ia ka kabu kaba biang ha kane ka elekshon MDC ka ban wan, u Bah Titos u la ong ba ka UDP kan sa thaw ia ka Executive Committee (EC) kaba thymmai ryngkat ka HSPDP ha ki District Council.

“Ngi don ia ka lad ka kabu kaba biang khamtam ka UDP ha baroh ki district, ka HSPDP ha West Khasi Hills bad ha ki katto katne ki constituency jong ka East Khasi Hills. Ngi don ha ka lad ka kabu kaba biang bha na ka bynta ka elekshon ban wan” ula ong.

Nalor kata u la ban jur ba ia ka elekshon MDC ym lah satia ban ia nujor bad ka elekshon Lok Sabha da kaba ong, “Ka long kaba iapher shibun. Phin iohi ia ka jingmih kaba pher ha ka elekshon MDC ka ban wan.”

“Nga tharai phi tip kham bha ia ka jinglong jingman halor ki jingshisha shaphang ka jinglah ka jong ngi haduh mynta. Ngi don ia ka jingshaniah kaba skhem bad nga ngeit skhem ba ka UDP bad ka HSPDP kin leh bha shuh shuh ha kane ka elekshon ka ban wan,” ong u Bah Titos da kaba bynrap, “Ha ka District Council, ngi (UDP) ngim don bynta lang ha ka sorkar, ngi don ha ka liang pyrshah. Kumta, Ngan iakhun ia kane ka elekshon kum ka liang pyrshah.”

Haba kylli une u nongialam ka UDP u la batai lypa ruh ba kan ym don satia kano kano ka seng sain pyrthei ka ban ioh ia ka jingjop jong bun ki kyrtong ban ialam ia ka EC ha ka elekshon ka ban wan.

“Phin iohi ia ka jingiakhleh namar ka elekshon MDC ka shong eh ha ki kyrtong watla ka seng ruh ka don ia ka bynta kaba khraw ban leh, hynrei phin iohi pat ia ka jingmih kaba pher ha kane ka elekshon,” ong u Bah Titos.

U Bah Titos u la kyntait ruh ban kynthoh ei ei ba la ka jingmih jong ka VPP kan ktah ia ka Seng UDP ne HSPDP da kaba ong, “Ngam kwah ban kren ei ei ha kaba iadei bad kiwei pat ki seng sain pyrthei.” “Nga dang don hapdeng ka kam ban pynkhreh ia ka elekshon MDC ka ban wan na ka bynta ka party bad ka kynhun RDA,” u la bynrap.

Ha kajuh ka por u president ka HSPDP u Bah KP Pangniang u la ong ba um don jingtip ei ei ba ki arngut ki MLA ka seng ki don ia ka jingthmu ban pyniasoh noh ia lade bad kiwei pat ki seng sain pyrthei.

“Kam don kano kano ka jingkylli ia ki MLA la kin ym kyrshan ia ki kyrtong. Ki dei shi bynta jong ka kynhun RDA,” u la ong.