Daw pynman ya ka Orange Festival ha chnong Narwan 

Syllad | The Rising MeghalayaJanuary 17, 2024

Ha ka thong wow tip u bna ka pyrthai chaphang ka chnong Narwan kam kawi na ki chnong wamih bha u soh khontara wa bang wathiang. Ka Narwan Multipurpose Co-operative Society Ltd ha ka 16tarik Duiatra da e wyrta Chula ko wa daw pynman ko ya ka Narwan Orange Festival ha ka 30^th wa ka 31^st Duiatra ha madan Mooknor Narwan East Jaintia Hills.

Ka chnong Narwan toh kawi na ki chnong wahap hapoh ka Sutnga-Saipung Constituency iong ka East Jaintia Hills District wei man ko leh ka chnong kawa ki bru im ki u kamai u pyndap pynbiang ya ka yung ka sem deiwa rep soh khontara wa kwi kwi ki mar rep, heiwa u khontara wa mih na ka chnong Narwan toh uwa bang wa thiang wei da pynlai Iaw ya O chadooh ka ri Dubai lyngba I yah luti ka Agriculture Department iong ka Sorkar Jylla.

U waheh chnong ka Narwan ma Lamsuk Langstang hawa klam wa ki nongthoh khubor da ong u wa I pynman ya kani ka Narwan Orange Festival toh wow khrin ya ki bru najan najngai u wan yuhkjat ki hapoh ka chnong Narwan wei wow sakhi ki da ki khmat iongki ya ki kper Soh Khontara kiwa em hapoh ka chnong Narwan kiwa da thung dabooh da ki manchwa longchwa da kip haw snem nachwa.

Neiliang u Leo Shadap, Secretary Chnong Narwan da khana u wa ha ki ar sngi iong kani ka Festival daw em chiboon ki prokram pynwyrngia ya ki paidbah kam ki chad, ki rwai, I put I tem ki wow yachimbynta da ki bru napoh ka District kamjooh nabar ka Jylla, I pynioo ya ka Phlim NUKSA, Fashion Show  wei ha ka sngi pynkut daw em ka Cycle Racing, I yakop bam Khontara wa ka yakop miat kynthai wa da e nam kam ka “Miss Narwan Orange Festival 2024”.